— बंगलादेशले अर्को महिना हुने ट्वान्टी–२० विश्वकपका लागि भारत जान अस्वीकार गरेको छ । बंगलादेश क्रिकेट बोर्ड (बीसीबी) ले बिहीबार यसको जानकारी गराउँदै प्रतियोगिताबाट आफ्नो टोलीको नाम हटाउने निश्चित गरेको हो ।
‘हाम्रो माग विश्वकप खेल्ने मात्र हो, तर भारतमा गएर होइन,’ बीसीबीका अध्यक्ष अमिनुल इस्लाम बुलबुलले पत्रकार सञ्चारकर्मीसँग भने । बंगलादेशले विश्वकपका आफ्ना खेलहरू श्रीलंकामा आयोजना गर्न गरेको अनुरोधलाई विश्व क्रिकेटको सर्वोच्च संस्था आईसीसीले अस्वीकार गरेको एक दिनपछि बीसीबीले यस्तो निर्णय गरेको हो ।
‘हाम्रो निर्णय परिवर्तन गर्ने कुनै सम्भावना नै छैन,’ बंगलादेशको अन्तरिम सरकारका युवा तथा खेलकुद हेर्ने सल्लाहकार असिफ नाजरुलले भने । ट्वान्टी–२० विश्वकप फेब्रुअरी ७ देखि भारत र श्रीलंकामा आयोजना हुँदै छ । बंगलादेशले आफ्नो सबै खेल भारतीय सहर कोलकाता र मुम्बईमा खेल्दै छ । बंगलादेशको समूहमा इंग्ल्यान्ड, वेस्ट इन्डिजसहित नेपाल र इटाली रहेको छ । बंगलादेशसँग नेपालले फेब्रुअरी १८ मा मुम्बईमा खेल्ने कार्यक्रम थियो ।
बंगलादेशका तीब्र गतिका बलर मुस्ताफिजुर रहमानलाई भारतीय क्रिकेट नियन्त्रण बोर्ड (बीसीसीआई) को निर्देशनमा इन्डियन प्रिमियर लिग (आईपीएल) को टोली कोलकाता नाइट राइडर्सले हटाएपछि यी दुई राष्ट्रबीचको विवाद बढेको थियो । यसअघि पनि आईपीएलको विभिन्न फ्रेन्चाइज टोलीबाट खेलिसकेका मुस्ताफिजुरलाई कोलकाता नाइट राइडर्सले डिसेम्बरमा १० लाख डलरमा अक्सनबाट लिएको थियो । तर भारतीय क्रिकेट कन्ट्रोल बोर्ड (बीसीसीआई) को निर्देशनमा कोलकाताले रहमानलाई आफ्नो टोलीबाट हटाएको थियो ।
बंगलादेशमा अल्पसंख्यक समुदायमाथि चरम दमन भइरहेको पृष्ठभूमिमा भारतले यो निर्णय गरेको थियो । भारतीय मिडियाले यसको निकै बढाइचढाइ गरेको दाबी बंगलादेशको छ । तर रहमानलाई आईपीएलमा हटाउँदा ढाकामा आक्रोश उर्लिंदै आएको छ । यसै कारण जनाउँदै भारतमा खेल्दा आफ्नो टोली असुरक्षित हुने बंगलादेशको भनाई थियो ।
आईसीसीले बुधबार स्वतन्त्र सुरक्षा निकायले समेत बंगलादेश क्रिकेट टोलीलाई भारतमा कुनै खतरा नरहेको रिपोर्टका आधारमा श्रीलंकामा बंगलादेशको खेल सार्न नसकिने जनाइसकेको थियो । आईसीसीको बुधबार बसेको भर्चुअल बैठकले बंगलादेशलाई विश्वकपमा आफ्नो स्थिति सुनिश्चित गर्न २४ घन्टाको समय दिइएको थियो । अन्यथा अर्को टोलीलाई बंगलादेशको स्थानमा खेलाउने जानकारी गराएको थियो । उच्च वरीयताका आधारमा विश्वकपमा छनोट हुन नसकेको स्कटल्यान्डले बंगलादेशको स्थान लिने सम्भावना छ ।
भारतका लागि पनि यो ठूलो मुद्दा बन्न सक्नेछ । भारत २०३० को राष्ट्रमण्डल खेलकुद आयोजना गर्दै छ, जसले भारतको २०३६ मा ओलम्पिक आयोजना गर्ने महत्त्वाकांक्षामा सहयोग पुर्याउने विश्वास लिइएको छ ।
‘बंगलादेश क्रिकेटलाई अत्यधिक मन पराउने राष्ट्र हो, यदि २० करोड जनताले विश्वकप हेरेनन् भने आईसीसीले ठूलो संख्यामा दर्शक गुमाउने छ,’ बीसीबी अध्यक्ष बुलबुलले भने, ‘क्रिकेट २०२८ को ओलम्पिकबाट पुनः प्रवेश गर्दै छ, ब्रिसबेन २०३२ को ओलम्पिकमा पनि हुनेछ र भारतले २०३६ को ओलम्पिक आयोजनाको दाबी गरिरहेको छ । यस्तो अवस्थामा बंगलादेश जस्तो क्रिकेट मन पराउने राष्ट्र नहुनु असफल हुनु हो ।’
