— दाङ निर्वाचन क्षेत्र नम्बर २ बाट आगामी प्रतिनिधिसभा निर्वाचनका लागि युवा अभियन्ता समीर ओलीले स्वतन्त्र उम्मेदवारी दिएका छन् ।
‘राजनीति मेरो महत्वाकांक्षा होइन, समाजप्रतिको जिम्मेवारी हो’ भन्ने नारासहित उनले चुनावी प्रतिस्पर्धामा उत्रिएको बताएका छन् । विवेकशील अभियानबाट राजनीतिक चेतनाको यात्रा सुरु गरेका ओली पछिल्लो एक दशकदेखि दाङमा सामाजिक तथा नागरिक आन्दोलनमा सक्रिय छन् । ठूला दल र तिनका उम्मेदवारप्रति बढ्दो नागरिक असन्तुष्टिका बीच आफूलाई ‘विकल्प’ का रूपमा प्रस्तुत गरेको उनको भनाइ छ ।
उनको क्षेत्रबाट एमालेबाट महासचिव शंकर पोखरेल, नेपाली कांग्रेसबाट किरण किशोर घिमिरे र राष्ट्रिय स्वतन्त्र पार्टीबाट सहमहामन्त्री विपिनकुमार आचार्यले उम्मेदवारी दिएका छन् ।
दाङ–२ मा सक्षम युवा नेतृत्वको अभाव रहेको र वैकल्पिक भनिएका शक्तिहरू पनि अलमलमा परेकाले आफू अघि सरेको ओलीको दाबी छ । 'राजनीति नगरी पनि सामाजिक काम गर्न सकिन्छ, तर राज्य परिवर्तनका लागि राजनीतिमा प्रवेश गर्नैपर्छ भन्ने बोध भयो,' उनी भन्छन् ।
यसअघि सम्पन्न स्थानीय तहको उपनिर्वाचनमा उनले वडा अध्यक्षका लागि पनि स्वतन्त्र उम्मेदवारी दिएका थिए । उक्त अनुभवले जनतासँग प्रत्यक्ष जोडिन र स्थानीय मुद्दा बुझ्न सहयोग पुगेको उनी बताउँछन् ।
