: अखिल नेपाल फुटबल संघ (एन्फा) को निर्वाचन स्थगित भएको छ। एन्फा निर्वाचन समितिको मंगलबार बसेको बैठकले तत्कालका लागि एन्फाको निर्वाचन कार्यक्रम तत्कालका लागि निर्वाचन समितिका सदस्यसचिव लोकेन्द्र ओलीले एक सूचना जारी गर्दै जानकारी दिएका हुन्।
‘उच्च अदालत पाटनले माघ ४ गते निर्वाचन सम्बन्धि प्रक्रिया यथास्थितिमा राख्नु भनी जारी भएको अन्तरिम आदेशको म्याद सूचना माघ ६ मा निर्वाचन समितिलाई प्राप्त भएकाले माघ ६ गतेदेखिका निर्वाचनका कार्यक्रम अर्को सूचना जारी नभएसम्मका लागि स्थगित गरिएको छ’, निर्वाचन समितिले जारी गरेको सूचनामा भनिएको छ।
एन्फाले साधारणसभा र निर्वाचन आगामी माघ २८ गते झापामा गर्ने तयारी थालेको थियो। चार वर्षको कार्यकाल ६ महिना बाँकी छँदै एन्फाले ‘अर्ली इलेक्सन’ गर्न लागेको थियो। एन्फाको यो निर्णय विधान विपरित भएको भन्दै सर्वत्र विरोध भएको थियो भने निर्वाचन प्रक्रिया तत्काल रोक्न अदालतमा मुद्दा पनि दायर भएको थियो।
एन्फाको माघ २८ गतेका लागि तय भएको ‘अर्ली इलेक्सन’ रोक्न अमित खत्रीले दायर गरेको रिटमा गत पुस २८ नै अदालतले अन्तरिम आदेश दिएको थियो। अदालतले अन्तरिम आदेश दिँदादिँदै पनि एन्फाले निर्वाचन प्रक्रिया अगाडि बढाएको थियो। गत माघ ३ गते अध्यक्ष, वरिष्ठ उपाध्यक्ष, उपाध्यक्ष र सदस्यका लागि मनोनयन दर्ता गरिएको थियो।
‘अर्ली इलेक्सन’कै लागि बुधबार तय गरिएको ‘बी’ डिभिजन क्लबको निर्वाचनलाई पनि एन्फाले स्थगित गरेको छ। एन्फाले प्राविधिक कारण देखाउँदै निर्वाचन स्थगित भएको जानकारी ‘बी’ डिभिजनका क्लबहरूलाई दिएको छ।
