— नेपालले महिला ट्वान्टी–२० विश्वकप ग्लोबल छनोटको पहिलो खेलमा आइतबार थाइल्यान्डसँग ८ विकेटको फराकिलो हार व्यहोरेको छ ।
टस हारेर पहिले ब्याटिङ गरेर नेपालले दिएको १२३ रनको झिनो लक्ष्य थाइल्यान्डले मात्र १६ दशमलव ५ ओभरमा २ विकेटको इतिमा पूरा गर्यो । थाइल्यान्डको जितमा नात्थीकन ५थमले अविजित अर्धशतकीय पारी खेलिन् । उनले ३९ बलमा १ छक्का र ९ चौकासहित ५७ रन जोडिन् । यस्तै नानपत कोचारियोङकाईले ३२ रन बनाउँदा अफिसरा शुवानचोनराथीले २८ रनको योगदान दिइन् ।
नेपालका लागि सीता रानामगरले २ विकेट निकाल्नुबाहेक अन्य कुनै पनि बलरले कसिलो बलिङ गर्न सकेनन् । त्यसअघि नेपाल त्रिवि क्रिकेट अन्तर्राष्ट्रिय रंगशाला कीर्तिपुरमा पूरा ब्याटिङ गरी १ सय २२ रनमा अलआउट भयो ।
सम्झना खड्का र विन्दु रावलले उत्कृष्ट सुरुवात दिलाए पनि मध्यक्रममा धरासायी हुँदा नेपालले त्यसको फाइदा उठाउन सकेन। सम्झना र विन्दुले ६ ओभरभित्रै ५४ रन जोडेका थिए । तर सम्झना आउट भएपछि नेपालको रनमा अंकुश लागेको थियो भने लगातर विकेट पनि झरिरह्यो ।
सम्झनाले ११ बल खेलि ६ चौका प्रहार गरी २६ रन बनाइन् । विन्दुले ५६ बल खेलि ६ चौका प्रहार गरी ४४ रन बनाए । विन्दुको यो व्यक्तिगत उच्च स्कोर पनि हो । २०१९ मा कुवेतविरुद्ध अविजित २८ रन बनाउनु यसअघिको उनको उच्च स्कोर थियो ।
उपकप्तान पुजा महतो १७ बल खेलि १२, कप्तान इन्दु बर्मा ६ बल खेलि ६, कविता कुँवर ४ बल खेलि २ रनमा आउट भइन् । पूर्व कप्तान रुविना क्षेत्रीले २ छक्का र १ चौका प्रहार गरि १७ रनमा आउट भइन् । कविता जोशी ७ बल खेलि ३ रनमा आउट भइन् ।
सीता रानामगर शुन्यमै आउट भइन् । रिया शर्मा ४ र सुमन विष्ट शुन्यमा आउट भइन् । थिपात्चा पुथावोङले ४ विकेट लिइन् । उनले ४ ओभरमा २७ रन खर्चेकी थिइन् । ओनिचा कामचोम्फुले ४ ओभरमा २४ रन खर्चेर २ विकेट लिइन् ।
नेपाल सन् २०११ यता थाइल्यान्डमाथि अहिलेसम्म विजय हात पार्न सकेको छैन । गत वर्ष त्रिकोणात्मक शृंखलामा थाइल्यान्डसँगको तीनै खेलमा नेपाल पराजित रहेको थियो । गत वर्षको मार्चमा बैंककमा भएको एसिया छनोटमा विजेता र उपविजेता बन्दै थाइल्यान्ड र नेपाल यस प्रतियोगिताका लागि छनोट भएका थिए ।
१० राष्ट्र सहभागि प्रतियोगिताको समूह ‘बी’ मा रहेको नेपालले थाइल्यान्डपछि, जनवरी २२ मा नेदरल्यान्ड्ससँग, जनवरी २४ मा जिम्बावेसँग तथा जनवरी २६ मा स्कटल्यान्डसँग प्रतियोगिताको खेल्ने छ । नेपालले जिम्बावे र स्कटल्यान्डसँग पहिलो पटक खेल्न लागेको हो ।
समूह ‘ए’ मा बंगलादेश, आयरल्यान्ड, नामिबिया, पपुवा न्यु गिनी र अमेरिका रहेका छन् । दुबै समूहका शीर्ष ३ टोली सुपर सिक्समा पुग्ने छन् । सुपर सिक्समा एकले अर्को टोलीसँग सामना गरेपछि शीर्ष चार टोली जुन–जुलाईमा इंग्ल्यान्ड र वेल्समा हुने ट्वान्टी–२० विश्वकपमा पुग्ने छन् ।
यस प्रतियोगिता अघिको अभ्यास खेलमा नेपाललाई आयरल्यान्डले ९९ रनले र अमेरिकाले ६ विकेटले पराजित गरेको थियो ।
