— ईरानका सर्वोच्च नेता अली खामेनेईले हजारौं मानिसहरु आन्दोलनमा मारिएको स्वीकारेका छन् ।
शनिबार सार्वजनिक मन्तव्य जारी गर्दै उनले आन्दोलनमा हजारौं मानिस मारिएको र केही मानिसहरु अमानवीय रुपमा मारिएको स्वीकार गरे ।
‘ईजरायल र अमेरिकासँग जोडिएकाहरुले ठूलो क्षति निम्त्याए र हजारौंको हत्या गरे,’ खामेनेईलाई उद्रृत गर्दै ईरानको सरकारी सञ्चारमाध्यमले जनाएको छ, ‘हामी अमेरिकी राष्ट्रपतिलाई यो मृत्युमा अपराधी मान्छौं । उनले ईरानमाथि क्षति र अपमान थोपरेका छन् ।’ ईरान सरकारले यसअघि पनि शत्रुहरुले दंगालाई समर्थन गरेको आरोप लगाउँदै आएको छ ।
शनिबार आफ्नो सम्बोधनमा खामेनेईले पछिल्लो अस्थिरतामा अमेरिका दोषी रहेको बताए । उनले यसअघि सामाजिक सञ्जालमा लेखेका थिए, ‘अमेरिकाको लक्ष्य ईरानलाई निल्नु हो ।’ ईरानमा २८ डिसेम्बरदेखि जारी सत्ताविरोधी आन्दोनलमा ज्यान गुमाउनेको यकिन संख्या बाहिरिएको छैन । फरक—फरक निकायले फरक फरक आंकडा बाहिर ल्याइरहेका छन् ।
यसअघि तेहरानका अस्पतालमा कार्यरत चिकित्सहरुलाई उद्रृत गर्दै बेलायती सञ्चारमाध्यम टाइम्सले कम्तिमा १२ हजारको मृत्यु भएको जनाएको थियो । अमेरिकास्थित ईरानी मानव अधिकार अभियन्ता समाचार एजेन्सी (एचआरएएनए) ले ३ हजार ९० जनाको मृत्यु भएको पुष्टि गरेको छ । तर, इन्टरनेट प्रतिबन्धका कारण स्पष्ट सूचना पाउन मुस्किल भएको उसले जनाएको छ ।
केही समयअघि मात्रै अमेरिकी राष्ट्रपति डोनाल्ड ट्रम्पले ईरानका प्रदर्शनकारीहरुलाई आन्दोलन जारी राख्न आग्रह गरेका थिए । आन्दोलनमा सरकारले दमन गरेमा अमेरिकाले सैन्य हस्तक्षेप गर्नसक्ने चेतावनी पनि उनले दिएका थिए ।
