— गर्भावस्थामा पारासिटामोलको प्रयोग सुरक्षित रहेको नयाँ अध्ययनले देखाएको छ । यसको प्रयोग गर्दा बच्चामा अटिजम वा विकास अवरोधजस्ता समस्या देखिने कुनै आधार पनि नरहेको यसले जनाएको छ ।
यसअघि गत वर्ष अमेरिकी राष्ट्रपति डोनाल्ड ट्रम्पले पारा सिटामोल स्वास्थ्यका लागि प्रतिकुल रहेकाले यसको प्रयोग गर्न आग्रह गरेका थिए । तत्कालै स्वास्थ्य संस्थाहरुदले उनको अभिव्यक्तीको आलोचना पनि गरेका थिए ।
लान्सेट जर्नलमा प्रकाशित नयाँ रिभ्युमा यसको सुरक्षालाई लिएर बहस अन्त्य गरिनुपर्ने उल्लेख छ ।
यसअघि गत वर्ष ट्रम्प प्रशासनले पारासिटामोल र टायलेनोल (गर्भावस्थामा महिलाले लिने पेनकिलर) ले गर्भको बच्चामा अटिजम गराउनसक्ने बताएका थिए ।
यसले स्वास्थ्यकर्मी र गर्भवति महिलाहरुमा दुविधा उत्पन्न गराएको थियो । नयाँ अध्ययनले त्यसलाई खारेज गरेको छ ।
‘लान्सेट अब्सेट्रिक्स, गाइनोकोलोजी एन्ड वुमन्स हेल्थ’ मा प्रकाशित यस प्रतिवेदनले गर्भावस्थामा पारासिटामोलको प्रयोग सम्बन्धी ४३ वटा अध्ययन–प्रतिवेदनलाई विश्लेषण गरेको थियो । ती अध्ययनहरुमा लाखौं महिला समावेश थिए ।
अध्ययनले गर्भावस्थामा औषधी सेवन गर्ने आमा र औषधि सेवन नगर्ने आमाहरुको तुलनात्मक अध्ययन पनि गरेको थियो ।
‘जब हामीले यो विश्लेषण गर्यौं । तब पारासिटामोलले अटिजमको जोखिम बढाउने कुनै पनि प्रमाण देखेनौं । कुनै सम्बन्ध भेटिएन,’ अध्ययनकी लिड स्टडी लेखिका तथा परामर्शदाता अब्स्टेट्रिसियन प्रोफेसर आस्मा खालिलले भनिन् , ‘सन्देश स्पष्ट छ , चिकित्सकको निर्देशनअनुसार प्रयोग गर्दा पारासिटामोल गर्भावस्थामा सुरक्षित विकल्प मानिन्छ ।’
सेन्ट जर्ज, युनिभर्सिटी अफ लण्डनमा प्रोफेसर रहेकी खलिले थपिन्, ‘यो महत्वपूर्ण छ , किनकी पारासिटामोल हामीले गर्भवति महिलालाई दुखाई वा ज्वरोमा प्रयोग गर्नका लागि सिफारिस गर्ने पहिलो औषधि हो ।’
