— नेपाली क्रिकेट टोलीलाई पूर्व सांसद एवं नोबेल अस्पतालका प्रबन्ध निर्देशक सुनिल शर्माले ३० लाख प्रदान गरेका छन् । गत सेप्टेम्बरमा यूएईको शारजाहमा भएको वेस्ट इन्डिजसँगको तीन खेलको ट्वान्टी–२० शृंखलामा विजय हात पारे नेपाली टोलीलाई ३० लाख प्रदान गर्ने घोषणा गरेका थिए ।
टेस्ट राष्ट्रसँग पहिलो पटक शृंखला खेल्ने क्रममा नेपालले वेस्ट इन्डिजसँगको सो शृंखला ऐतिहासिक रूपमा २–१ ले जितेको थियो ।
विश्वकप खेल्न जाने नेपाली क्रिकेट टोलीको विदाइ घोषणा कार्यक्रममा उनले कप्तान रोहित पौडेललाई घोषित रकमको चेक हस्तान्तरण गरेका थिए । विश्वकपको सुपर एटमा पुगेमा उनले नेपाली टोलीलाई २० लाख प्रदान गर्ने घोषणा पनि सोही कार्यक्रममा गरेका थिए ।
नोबेल अस्पतालका सञ्चालक शर्माले खेलाडी र उनका परिवारलाई दुई वर्ष निःशुल्क उपचार गरिदिने पनि घोषणा गरे ।
