: आगामी फागुन २१ गतेका लागि तय भएको प्रतिनिधिसभा निर्वाचनका लागि दैलेखमा मुख्य निर्वाचन अधिकृतको कार्यालय स्थापना गरिएको छ। प्रतिनिधिसभा निर्वाचन क्षेत्र नं. १ अन्तर्गत जिल्ला अदालत दैलेखमा शुक्रबार मुख्य निर्वाचन अधिकृतको कार्यालय स्थापना गरिएको हो।
कार्यालयको स्थापनाको क्रममा दैलेख जिल्लाका मुख्य निर्वाचन अधिकृत तथा जिल्ला न्यायाधीश कुलप्रसाद पाण्डेले निष्पक्ष, स्वतन्त्र र भयमुक्त वातावरणमा निर्वाचन सम्पन्न गराउन सबै जिम्मेवार निकायको भूमिका महत्त्वपूर्ण रहेको बताए। उनले निर्वाचन सफल बनाउन जिल्लाका राजनीतिक दल, नागरिक समाज, पत्रकार तथा सरोकारवाला निकायसँग आवश्यक समन्वय भइरहेको बताए।
दैलेख निर्वाचन क्षेत्र नं. २ का लागि निर्वाचन अधिकृतमा कानुन, न्याय तथा संसदीय मामिला मन्त्रालयका उपसचिव लोकहरी कँडेललाई नियुक्त गरिएको छ। दैलेखका दुवै निर्वाचन क्षेत्रमा कुल १ लाख ६१ हजार २ सय ४ जना मतदाता रहेका छन्। यहाँ १३९ मतदान स्थल र २०८ मतदान केन्द्र निर्धारण गरिएका छन्।
