ह्वाइट हाउसले इरानले करिब ८०० जनाको मृत्युदण्ड रोकेको दाबी गरेको छ। ह्वाइट हाउसकी प्रेस सचिव क्यारोलिन लेभिटका अनुसार अमेरिकी राष्ट्रपति डोनाल्ड ट्रम्प र उनको टोलीले हत्या जारी रहेको खण्डमा गम्भीर परिणाम भोग्नुपर्ने सन्देश पठाएपछि मृत्युदण्ड रोकिएको हो।
शुक्रबारका लागि तय गरिएको ८०० मृत्युदण्ड स्थगित भएको जानकारी बिहीबार नै ट्रप्पलाई आएको उनको दाबी छ। उनले भनिन्, ‘राष्ट्रपति ट्रम्प र उनको टोलीले परिस्थितिलाई नजिकबाट निगरानी गरिरहेका छन्। राष्ट्रपतिका लागि सबै विकल्पहरू खुला छन्।’
इरानमा केही दिनदेखि विरोध प्रदर्शनहरू जारी छ। बीबीसीमा उल्लेख भएअनुसार धेरै रिपोर्टहरूले इरानी अधिकारीहरूले प्रदर्शनकारीहरूलाई मृत्युदण्ड दिइरहेका दाबी गरेका छन्। अमेरिकी राष्ट्रपति ट्रम्पले इरानले कुनै पनि प्रदर्शनकारीलाई मृत्युदण्ड दिएमा अमेरिकाले त्यसविरुद्ध कडा कारबाहीगर्ने चेतावनी दिएका थिए।
इरफान सोल्तानीलाई हालै तेहरानमा भएको विरोध प्रदर्शनको क्रममा हिरासतमा लिइएको थियो। एक आफन्तले बीबीसी फारसीलाई बताएअनुसार दुई दिन भित्रै अदालतले उनलाई मृत्युदण्डको सजाय सुनाएको छ। तर, बिहीबार इरफान सुल्तानीको मृत्युदण्ड रोकिएको खबर आएको थियो।
इरानको राज्य प्रसारण एजेन्सीले न्यायपालिकालाई उद्धृत गर्दै भनेको छ, ‘इरफान सोल्तानीलाई जनवरी १० मा अशान्तिको समयमा पक्राउ गरिएको थियो। उनीमाथि देशको आन्तरिक सुरक्षा विरुद्ध भेला भएको र षड्यन्त्र गरेको र शासन विरुद्ध प्रचार गतिविधि गरेको आरोप छ।’
बीबीसी फारसीका अनुसार न्यायपालिकाले भनेको छ, ‘यदि अभियोजन पक्षले आफ्नो आरोप प्रमाणित गर्छ र सक्षम अदालतले कानुनी फैसला दिन्छ भने कानूनद्वारा तोकिएको सजाय कारावास हो। यी आरोपहरूका लागि मृत्युदण्डको कुनै प्रावधान छैन।’ रिपोर्टअनुसार इरफान सुल्तानी हाल कारज केन्द्रीय कारागारमा छन्।
