— एक्सट्रिम इनर्जी ड्रिंक नेपाली महिला राष्ट्रिय क्रिकेट टोलीको मुख्य प्रायोजक बनेको छ ।
नेपाल क्रिकेट संघ (क्यान) ले शुक्रबार जनाए अनुसार नेपाली महिला राष्ट्रिय क्रिकेट टोलीका लागि एक्सट्रिम इनर्जी ड्रिंकले दुई वर्षे सम्झौता गरेको हो ।
सम्झौता अनुरुप एक्सट्रिम इनर्जी ड्रिंकले महिला क्रिकेटको प्रवर्द्धन गर्न क्यानलाई प्रति वर्ष ८० लाख उपलब्ध गराउने छ । क्यानले ३ साताअघि महिला राष्ट्रिय क्रिकेट टोलीको जर्सी प्रायोजनका लागि समाजिक सञ्जालमार्फत बोलपत्र आह्वान गरेको थियो, जसमा न्यूनतम मूल्य वार्षिक ६० लाख रुपैयाँ राखिएको थियो ।
नेपाली महिला क्रिकेट टोलीले पाएको यो अहिलेसम्मकै सबैभन्दा ठूलो प्रायोजक हो । क्यानले एक्सट्रिम इनर्जी ड्रिंकसँगको सहकार्य निकै फलदायी हुने विश्वास लिएको छ । दुई महिना अघि सम्पन्न नेपाल प्रिमियर लिग (एनपीएल) मा एक्सट्रिम इनर्जी ड्रिंक काठमाडौं गोर्खाजसँग आवद्ध थियो ।
