: सिन्धुलीको तीनपाटन गाउँपालिका-३ राम्चे कोलबोटेकी ५३ वर्षीया टंकमाया बुढाथोकीको हत्या आफ्नै भतिजको संलग्नता रहेको पुष्टि भएको छ।
तीनपाटन गाउँपालिका–३ राम्चेमै बस्ने वर्ष ३० का दीपक भन्ने शान्तीबहादुर बुढाथोकी र छिमेकी वर्ष २९ का सम्पत भन्ने चुक्तबहादुर कटुवालले टंकमायाको हत्या गरेको खुल्न आएको सिन्धुलीका प्रहरी प्रमुख लालध्वज सुवेदीले जानकारी दिए।
शान्ति बहादुर बुढाथोकी मृतक टंकमायाको नातामा भतिज हुन्। उनी यसअघि २०७३ सालमा चोरी कसुरमा समेत दोषी ठहर भई एक वर्ष कैद सजाय भुक्तान गरी छुटेको प्रहरीको अभिलेखमा उल्लेख छ। टंकमायाको हत्यामा संलग्न दुवै जनालाई प्रहरीले पक्राउ गरी अनुसन्धान अघि बढाएको छ।
अनुसन्धानका क्रममा बुढाथोकी र कटुवाल दुवैले टंकमायाको हत्या गरेको स्वीकार गरेको प्रहरी प्रमुख सुवेदीको भनाइ छ। ‘उनीहरू दुवै जना लागुऔषध सेवाकर्ता हुन्। उनीहरूले लागुऔषधको नसामा घरमा एक्लै बस्दै आएकी टंकमायाको घाँटी थिचेर र टाउकोमा मुग्रोले हानी हत्या गरेको स्वीकार गरेका छन्,’ प्रहरी प्रमुख सुवेदीले भने।
५३ वर्षीया टंकमाया बुढाथोकी गत ९ गते बुधबार बिहानबाट एकाएक घरबाट हराएकी थिइन्। उनको खोजतलासका लागि ज्वाइँ भीमबहादुर थापाले इलाका प्रहरी कार्यालय बेलघारीमा जानकारी गराएपछि प्रहरीले हुलिया परिपत्र गरेर खोजतलास थालेको थियो।
टंकमाया बेपत्ता भएको घटनाको विषयमा अनुसन्धान गर्न सिन्धुलीका प्रहरी प्रमुख (एसपी) सुवेदीकै कमाण्डमा टोली खटिएको थियो। सोही क्रममा टंकमायाको घरमा प्रारम्भिक अनुसन्धान तथा घटनास्थलको जाँच गर्दा टंकमाया सुत्ने खाटमा रगत तथा दिसा लत्पतिएको अवस्था भेटिएपछि प्रहरीले थप अनुसन्धानका लागि बागमती प्रदेश प्रहरी कार्यालयबाट ‘ट्रयाकर डग’ तथा विज्ञसहितको प्रहरी टोली परिचालन गरी खोजतलास सुरु गरेको थियो।
टंकमायाको खोजतलासका लागि प्रहरीले ड्रोन क्यामराको समेत प्रयोग गरेको थियो। तर १२ दिनपछि टंकमायाको शव घरबाट करिब १ किलोमिटर उत्तरतर्फ बाँसको झ्याङमा पात तथा पत्करले छोपिएको अवस्थामा फेला पारिएको थियो। उक्त घटनामा संलग्न दुवै जनामाथि थप अनुसन्धानका लागि सिन्धुली अदालतबाट थप पाँच दिनको म्याद थप गरिएको पनि प्रहरीले जनाएको छ। घटनामा अन्यको समेत संलग्नता छ कि भन्ने आशंकामा प्रहरीले अनुसन्धान अघि बढाएको बताइएको छ।
