: कांग्रेस विशेष महाधिवेशन सुरू भएको छ। आइतबार काठमाडौंको भृकुटीमण्डपमा पार्टी महामन्त्रीद्वय गगन थापा र विश्वप्रकाश शर्माले विशेष महाधिवेशनको उद्घाटन गरेका हुन्। उनीहरूले दियो बालेर र विरूवामा पानी हालेर महाधिवेशन उद्घाटन गरेका हुन्। उदघाटन भएसँगै विशेष महाधिवेशन औपचारिक रुपमा सुरू भएको छ।
विशेष महाधिवेशनका लागि बिहानैदेखि नाम दर्ता प्रक्रिया सुरू भएको थियो। उद्घाटन समारोहअघि काठमाडौं उपत्यकाको विभिन्न स्थानबाट शक्ति प्रदर्शनका रूपमा जुलुस निकालिएको थियो।
विशेष महाधिवेशको बन्द सत्र पनि आजदेखि नै सुरू हुने जनाइएको छ। विशेष महाधिवेशन भोलिसम्म सञ्चालन हुनेछ। विशेष महाधिवेशन पक्षधरले ६० प्रतिशतभन्दा बढी प्रतिनिधिको सहभागी हुने दाबी गरेको छ।
पार्टी ५४ प्रतिशत महाधिवेशन प्रतिनिधिहरूको हस्ताक्षर संकलन गरी पार्टी विधानको धारा १७ (२) बमोजिम विशेष महाधिवेशनको माग गरिएको थियो। सोही अनुसार महामन्त्रीद्वय थापा र शर्माको नेतृत्वमा महाधिवेशन हुन लागेको हो। तर, कांग्रेस संस्थापन पक्षले भने नियमित महाधिवेशनको मिति तय भइसकेको भन्दै विशेष महाधिवशेनलाई अस्वीकार गरेको छ ।
