— कालीगण्डकी करिडोरअन्तर्गत पिपलडाँडा–गैडाकोट सडकको पाल्पास्थित रामपुर नगरपालिका–६, कालीआँपमा मोटरसाइकलको ठक्करबाट पैदलयात्रीको मृत्यु भएको छ ।
मृत्यु हुने रामपुर नगरपालिका–७, मझुवाका ६४ वर्षीय श्याम बहादुर सेन ठकुरी रहेको प्रहरीले जनाएको छ । गेझा बर्दलेबाट रामपुरको बेझाडतर्फ जाने क्रममा लु ७८ प २८०७ नम्बरको मोटरसाइकलले पैदलयात्री सेन ठकुरीलाई ठक्कर दिएको थियो । ठक्करबाट गम्भीर घाइते ठकुरीलाई उपचारका लागि तत्काल रामपुर अस्पताल पुर्याएकामा उपचारका क्रममा निधन भएको इलाका प्रहरी कार्यालय रामपुरका प्रहरी निरीक्षक लाल बहादुर सुनारले बताए ।
ठक्कर दिएर दुर्घटनामा परेको मोटरसाइकल चालक रामपुर–६, तिलकपुरका २३ वर्षीय हिमाल राना र पछाडि बसेका २१ वर्षीय मेगबहादुर खन्गाहा घाइते भएको इलाका प्रहरी कार्यालय रामपुरले जनाएको छ । मोटरसाइकल चालकलाई रामपुर अस्पतालमा प्राथमिक उपचार गरेपछि थप उपचारका लागि लुम्बिनी मेडिकल कलेज प्रभास तानसेन ल्याइएको छ ।
यसैबीच, राति अबेर स्थानीय बासिन्दाले कालीगण्डकी करिडोर अन्तर्गत सडकमा प्रहरी बिट राख्नुपर्ने माग राख्दै केही समय सडक अवरुद्ध गरेका थिए । स्थानीयले टायर बालेर सडक अवरुद्ध गर्दा केही सय सडकमा सवारीसाधन प्रभावित भएका थिए । महेन्द्र राजमार्गको गैंडाकोट नवलपुर र तनहुँको खैरेनीटार हुँदै सवारी साधन कालीगण्डकी करिडोर भएर पाल्पा लगायत यस भेगमा सवारी साधन सञ्चालन हुन्छ ।
