: विभागीय टोली नेपाल पुलिस क्लब र न्यु डायमन्ड युथ स्पोर्ट्स क्लब नवौं केएनपी नेरोलेक शेरबहादुर खड्का स्मृति राष्ट्रिय महिला भलिबल प्रतियोगिताको फाइनलमा प्रवेश गरेका छन् । चार टोलीको सहभागिता रहेको प्रतियोगितामा राउन्ड रोविन लिगमा लगातार दोस्रो जित निकाल्दै
पुलिस र न्यु डायमन्ड एक खेल अगावै फाइनलमा पुगेका हुन् । बिहीबार भएका दुवै खेलमा पुलिस र न्यु डायमन्डले आ–आफ्नो प्रतिद्वन्द्वीलाई समान ३–२ सेटले पराजित गरेका थिए ।
त्रिपुरेश्वरस्थित राष्ट्रिय खेलकुद परिषद् (राखेप) को कभर्डहलमा बिहीबार भएको पहिलो खेलमा पुलिसले अर्को विभागीय टोली त्रिभुवन आर्मी क्लबलाई २०–२५, २५–१९, २४–२६, २५–२०, १५–११ ले पराजित ग¥यो । अर्को खेलमा न्यु डायमन्डले एपीएफ क्लबलाई २५–१६, २५–२१, १९–२५, १९–२५, १५–७ ले हरायो । लगातार दोस्रो पराजयसँगै आर्मी र एपीएफ उपाधि होडबाट बाहिरिएका हुन् । यसअघि पुलिसले एपीएफलाई ३–० र न्यु डायमन्डले आर्मीलाई ३–० ले नै पाखा लगाएको थियो ।
बिहीबारको पहिलो खेलमा पुलिसकी उषा भण्डारी र दोस्रोमा न्यु डायमन्डकी सलिना बुढा मगर ‘प्लेयर अफ द म्याच’ चुनिए । उनीहरूले समान १५ हजार रुपैयाँ नगद पुरस्कार पाए ।
शेरबहादुर खड्का स्मृति प्रतिष्ठान, बालकोटको आयोजना तथा बहुराष्ट्रिय पेन्ट कम्पनी केएनपी नेरोलेकको मुख्य प्रायोजनमा भइरहेको प्रतियोगितामा शुक्रबार दुई खेल हुनेछ । पहिलो खेल न्यु डायमन्ड र पुलिसबीच हुनेछ । यो खेलले नै राउन्ड रोविन लिगमा शीर्ष स्थानमा रहने टोलीको टुंगो लगाउने छ । दोस्रो खेलमा एपीएफले आर्मीसँग प्रतिस्पर्धा गर्नेछ ।
सहभागी चार टोलीमध्ये आर्मीले मात्र यो प्रतियोगिताको उपाधि जित्न सकेको छैन । पुलिस साविक विजेता हो भने न्यु डायमन्ड सातौं संस्करणको विजेता हो । एपीएफ सुरुका ६ संस्करणमा च्याम्पियन बनेको थियो ।
प्रतियोगिताको विजेताले पाँच लाख, उपविजेताले दुई लाख ५० हजार र तेस्रो हुने टोलीले एक लाख २५ हजार नगद पुरस्कार प्राप्त गर्ने छन् । प्रतियोगिताको सर्वोत्कृष्ट खेलाडीलाई ५० हजार नगद पुरस्कार प्रदान गरिने छ । विधागततर्फ सात उत्कृष्टलाई जनही २५ हजार नगदबाट पुरस्कृत गरिने छ ।
