— अमेरिकी राष्ट्रपति डोनाल्ड ट्रम्पले इजरायल–प्यालेस्टिनी शान्ति प्रक्रियाको दोस्रो चरण लागु गर्न हमासले तत्कालै आफुलाई निशस्त्रीकरण गर्नुपर्ने बताएका छन् । हमासले हतियार नछाडे उसको हालत निकै खराब हुने चेतावनी उनले दिएका छन् ।
राष्ट्रपति ट्रम्पले फ्लोरिडामा इजरायली प्रधानमन्त्री बेन्जामिन नेतान्याहूसँग भेटेपछि सोमबार यस्तो धारणा अघि सारेका हुन् ।‘उनीहरूले निशस्त्रीकरण गरेनन् भने नर्कको मूल्य चुकाउनु पर्नेछ,’ ट्रम्पले भने । उनले गाजामा पुुननिर्माण चाडैं नै सुरु हुनसक्ने पनि बताए ।
गत अक्टुबरमा गाजा शान्ति योजना लागु भएको थियो । यस २० बुँदे योजनाको गाजा क्षेत्रमा एक प्राविधिक सरकार स्थापना हुने, हमासले निशस्त्रीकरण गर्ने र इजरायली सेना यस क्षेत्रबाट फिर्ता हुने उल्लेख छ । यी प्रक्रिया पूरा भएपछि मात्रै गाजाको पुनर्निर्माण सुरु हुनेछ।
इजरायली प्रधानमन्त्री नेतान्याहूले इजरायली सेना फिर्ता हुनुभन्दा पहिले नै हमासलाई निशस्त्रीकरणका लागि दबाब दिइरहेका छन् । यता, हमासका अधिकारीहरूले स्वतन्त्र प्यालेस्टिनी राज्य र पूर्ण निशस्त्रीकरण एकसाथ हुनुपर्ने बताइरहेका छन् ।
शान्ति योजनालाई झन्डै शतप्रतिशत पालना गरिरहेको भन्दै ट्रम्पले इजरायलको प्रशंसा गरे । जबकी, इजरायलले शान्ति योजनाविपरीत गाजामा निरन्तर आक्रमण जारी राखेको छ ।
राष्ट्रपति ट्रम्पले इरानमाथि पनि निशाना साँधे । ब्यालेस्टिक मिसाइल वा आणविक हतियार कार्यक्रमलाई फेरि सुरु गरेमा अमेरिकाको सहयोगमा इरानमा अर्को ठूलो आक्रमण हुनसक्ने चेतावनी उनले दिए ।
जवाफमा, इरानका सर्वोच्च नेताका शीर्ष राजनीतिक सल्लाहकार अली शामखानीले सामाजिक सञ्जाल एक्समा लेखेका छन्, ‘इरान विरुद्धको कुनै पनि आक्रमणको तत्काल कठोर प्रतिक्रिया दिइनेछ ।’
