: रौतहटमा जाडो बढ्दै गएपछि जनजीवन प्रभावित हुन थालेको छ। बाक्लो हुस्सु र शीतलहरूका कारण सर्वसाधारणको दैनिकी कष्टकर बन्दै गएको छ भने धेरै पालिकाले विद्यालय बन्द गरेका छन्।
चिसो बढ्दै गएपछि डिभिजन वन कार्यालय रौतहटले सार्वजनिक स्थानमा आगो ताप्न दाउरा वितरण सुरू गरेको छ। चन्द्रपुर नगरपालिकाभित्र र पालिकाहरूले मागेको स्थान,सर्वसाधारणको बढी आवतजावत हुने स्थान,चोक–चौतारा तथा सार्वजनिक स्थलमा दाउरा वितरण गरिएको डिभिजन वन प्रमुख हेमन्त साहले बताए ।
'चिसोबाट प्रत्यक्ष प्रभावित सर्वसाधारणलाई राहत दिने उद्देश्यले यो पहल थालिएको हो, विशेषगरी बिहान र साँझको समयमा वृद्धवृद्धा,मजदुर तथा सर्वसाधारणलाई यसले सहजता मिल्ने अपेक्षा कार्यालयको छ,'प्रमुख साहले भने ।
पछिल्ला दिनहरूमा तापक्रम निरन्तर घट्दै गएपछि मधेसका विभिन्न जिल्लामा जनस्वास्थ्य र दैनिक जनजीवनमा प्रत्यक्ष असर परिरहेको छ। सम्बन्धित निकायहरूले चिसो अझै केही दिन कायम रहने पूर्वानुमान रहेकाले आवश्यक सतर्कता अपनाउन र विपन्न तथा जोखिममा रहेका समुदायका लागि थप राहत कार्यक्रम ल्याइनुपर्ने चन्द्रपुरको युवा अमर लामाले बताए ।
जाडो बढेपछि दैनिक ज्याला मजदुरी गर्ने र कम आय भएका विपन्न,बालबालिका र वृद्धवृद्दालाई बाहिर निस्कन समस्या भएको छ।
