: सुनसरीको धरान उपमहानगरपालिकामा गाँजासहित अटो चालक पक्राउ परेका छन्। पूर्वी पहाडी जिल्लाहरू धनकुटा र भोजपुर लगायतका जिल्लाबाट सुनसरी हुँदै भारततर्फ हुने गाँजा तस्करी अझै नियन्त्रण बाहिर रहेको छ।
सोमबार राति धरान उपमहानगरपालिका–१३ फुस्रेस्थित चिण्डे डाँडाबाट धरानतर्फ आउँदै गरेको को १ त ५९३४ नम्बरको अटो शंकास्पद देखिएपछि सशस्त्र प्रहरीले चेकजाँच गरेको थियो। चेकजाँचका क्रममा अटोभित्र लुकाइ छिपाइ राखिएको ५ पोका तयारी गाँजा फेला परेको सशस्त्र प्रहरी बेस धरानका सशस्त्र प्रहरी नायब उपरीक्षक सुदन आचार्यले बताए। उनले बरामद गरिएको गाँजाको तौल १०९.५६ केजी रहेको जानकारी दिएका छन्।
गाँजासहित धरान उपमहानगरपालिका–१३ निवासी अटो चालक २८ वर्षीय राकेश मरिकलाई पक्राउ गरिएको सशस्त्र प्रहरी नायब उपरीक्षक आचार्यले बताए। उनले बरामद गरिएको लागूऔषध गाँजा, अटो र चालकलाई आवश्यक कारबाहीका लागि इलाका प्रहरी कार्यालय धरानमा बुझाइएको बताए। घटनाबारे थप अनुसन्धान भइरहेको प्रहरीले जनाएको छ।
धरान क्षेत्रमा पछिल्लो समय दैनिकजसो गाँजा बरामद हुने गरेको प्रहरीले बताएको छ। धनकुटा लगायतका पहाडी जिल्लामा उत्पादन हुने गाँजा सुनसरी हुँदै खुला सीमाको फाइदा उठाएर भारततर्फ तस्करी हुने गरेको पाइएको छ। विशेषगरी रातिको समयमा गाँजा तस्करी बढी हुने गरेको प्रहरीको भनाइ छ।
प्रहरीका अनुसार धनकुटा जिल्लामा गाँजा खेती नियन्त्रणमा पर्याप्त ध्यान नदिँदा तस्करीको समस्या झनै जटिल बन्दै गएको छ। स्थानीय किसानहरूले अन्य परम्परागत खेतीभन्दा गाँजा खेतीलाई बढी प्राथमिकता दिन थालेपछि गाँजा तस्करीमा वृद्धि भएको छ। गाँजाबाट छिटो र धेरै आम्दानी हुने भएकाले किसानहरू यसतर्फ आकर्षित हुने गरेका छन्।
पछिल्लो समय खुला सीमा, कमजोर अनुगमन र संगठित तस्कर समूहका कारण सुनसरी लागूऔषध तस्करीको मुख्य मार्ग बन्दै गएको छ। यसले शान्ति सुरक्षा कायम गर्न प्रहरीका लागि ठूलो चुनौती थपिएको छ। सुनसरीका प्रहरी प्रमुख एसपी केशवकुमार थेबेले प्रहरीले गोली चलाएर समेत गाँजा तस्कर पक्राउ गर्नुपरेको बताए।
गाँजा नेपालमा प्रतिबन्धित लागूऔषध हो। यसको उत्पादन, ओसारपसार, बिक्री वितरण तथा सेवन कानुनी रूपमा अपराध मानिन्छ। गाँजा लगायतका लागूऔषध सेवनको दुरुपयोगले, अपराधमा वृद्धि र युवापुस्तामा नकारात्मक असर पारिरहेको छ। एसपी थेबेले प्रहरीले गाँजा तस्करी नियन्त्रणका लागि सीमा क्षेत्र र मुख्य मार्गमा निगरानी कडा बनाएर गाजा तस्कर पक्राउ गरिरहेको भएपनि पहाडी जिल्लाबाट गाँजा तस्करी नरोकिएको बताए।
