— निर्वाचनलाई भयमुक्त वातावरणमा सम्पन्न गर्ने जिम्मेवारी सरकारको भएको राष्ट्रिय स्वतन्त्र पार्टीका नेता शिशिर खनालले बताएका छन् । निर्वाचन गराउन आएको सरकारलाई रास्वपाको समर्थन रहेको बताउँदै खनालले भयरहित वातावरणमा निर्वाचन गराउनुपर्ने बताए ।
प्रधानमन्त्री सुशीला कार्कीले सोमबार सिंहदरबारमा राजनीतिक दल, निर्वाचन आयोग, सुरक्षा निकाय र नागरिक समाजका व्यक्तिहरूको बैठकमा रास्वपा नेता खनालले उक्त कुरा राखेका हुन् । निर्वाचनमा शान्ति सुरक्षा, प्रचारप्रसारको विषय प्रमुख रहेको उनको भनाइ थियो । 'चुनावमा शान्ति सुरक्षाको विषय नै हो, प्रचार प्रसारको विषय नै हो । भयरहित वातावरणमा सहभागिता, नेताहरूको, पार्टीहरूको, उम्मेदवारहरूको सुरक्षाको ग्यारेन्टीको जिम्मेवारी सरकारको हो,’ उनले भने ।
अन्तरजिल्ला चुनावको व्यवस्था गर्नका लागि रास्वपाको समर्थन रहेको पनि नेता खनालको भनाइ थियो । ‘अन्तरजिल्ला मतदान व्यवहारिक रुपमा सम्भव छ भनेर निर्वाचन आयोगले जेन-जी प्रतिनिधिलाई भन्नुभएको छ । यसमा राजनीतिक प्रतिबद्धता चाहियो भन्नेकुरा भनिएको छ । राजनीतिक प्रतिबद्धताका कारणले मात्रै असम्भव हो भने राष्ट्रिय स्वतन्त्र पार्टीको तर्फबाट हामी तयार छौँ,' उनले भने ।
