— मोटरसाइकल दुर्घटनामा कृषि ज्ञान केन्द्र खोटाङका कार्यालय सहयोगीको मृत्यु भएको छ । दिक्तेल रूपाकोट मझुवागढी नगरपालिका–७ दोर्पाचिउरीडाँडाका ३० वर्षीय दिनेश आचार्यले चलाएको मोटरसाइकल सोल्मामा शुक्रबार बेलुकी दुर्घटना हुँदा मोटरसाइकलको पछाडि सवार सोही नगरपालिका–१ दिक्तेलका ५५ वर्षीय पदमबहादुर खड्काको मृत्यु भएको हो ।
दोर्पाबाट दिक्तेल आउँदै गरेको प्रदेश १–०५००१ प १७६४ नम्बरको मोटरसाइकल मध्यपहाडी लोकमार्गअन्तर्गत सोल्मामा सडकभन्दा करिब एक सय ५० मिटर तल खस्दा खड्का घाइते भएका थिए । बेहोस अवस्थामा जिल्ला अस्पताल दिक्तेल पुर्याइएका खड्कालाई चिकित्सकले मृत घोषणा गरेको जिल्ला प्रहरी कार्यालय खोटाङका सूचना अधिकारी प्रशान्त मिश्रले बताएका छन् । उनका अनुसार मोटरसाइकल चालक आचार्यले मादक पदार्थ सेवन गरेको अवस्थामा रहेको र बेलुकी ६ बजे आफैं प्रहरीसमक्ष आएर दुर्घटनाबारे जानकारी गराएका थिए ।
दुर्घटनाको जानकारी आउनासाथ खोजी गर्दा मोटरसाइकल रूखमा अल्झिरहेको र त्यसभन्दा तल खड्का बेहोस अवस्थामा फेला परेको मिश्रले सुनाएका छन् । ‘चालक मादक पदार्थ सेवन गरेको अवस्था भएकाले कतिखेर दुर्घटना भयो भन्ने एकीन भएको छैन,’ मिश्रले भने, ‘बेलुकी ६ बजे आफैं आएर जानकारी गराएपछि खोज्ने क्रममा सोल्मा भन्ने ठाउँमा एक सय ५० मिटर तल मोटरसाइकल पछाडि सवार बेहोस् अवस्थामा फेला परेको र मोटरसाइकल रूखमा अल्झिएको अवस्थामा फेला परेको हो ।’
खड्काको शव जिल्ला अस्पतालको शवगृहमा राखिएको छ । चालक आचार्यलाई मेडिकल गरी नियन्त्रणमा लिएको मिश्रले जनाएका छन् ।
