: नेकपा एमालेका अध्यक्ष केपी शर्मा ओलीले अहिले सिरक ओढेर म जेनजी हुँ भन्दै थर्काउनेको जमात बढेको बताएका छन्। एमाले ११ औँ महाधिवेशनबाट निर्वाचित नयाँ केन्द्रीय कमिटीको प्रथम बैठकलाई सम्बोधन गर्दै उनले यसकाविरुद्ध एमाले टोल सुरक्षा समिति बनाएर अघि बढ्ने बताएका हुन्।
ओलीले भने,ʻअब सहर गाउँ सबै ठाउँमा टोल सुरक्षा समिति बनाएर सुरक्षाको व्यवस्था मिलाउनु पर्ने छ। अहिले सिरक ओढेर म जनजी हुँ भन्दै थर्काउनेको जमात बढेको छ। त्यसका विरुद्ध एमाले टोल सुरक्षा समिति बनाएर अघि बढ्ने छ।ʼ
देश अहिले अप्ठेरो अवस्थामा रहेको बताउँदै अध्यक्ष ओलीले त्यो अप्ठेरोबाट देशलाई सहज बाटोमा ल्याउने काम एमालेले गर्ने बताए। ‘हामी गर्छौँ त्यो, नत्र कसले गर्छ त यो देशमा ? अप्ठेरो अवस्था आयो, नेकपा एमाले बाहेक अन्य बोल्ने शक्ति नै देखिएन त’, उनले भने।
अध्यक्ष ओलीले एमालेले आफ्नो गतिशीलतालाई अझ तीव्रता दिएर अघि बढ्ने बताए।
