— अर्थमन्त्री रामेश्वर खनालले राजनीतिक स्थिरता नभएसम्म आर्थिक सूचक राम्रो नहुने भएकाले अहिलेको संकट समाधान गर्न निर्वाचनको विकल्प नरहेको बताएका छन् । उनले निर्वाचनको वातावरण तयार गर्न सरकार दृढताका साथ लागिरहेकाले त्यसमा प्रतिबद्ध भएर आउन राजनीतिक दललाई आग्रह पनि गरेका छन् ।
रूपन्देही उद्योग संघको आयोजनामा बिहीबारदेखि बुटवलमा सुरु भएको ‘१६ औं राष्ट्रिय औद्योगिक प्रदर्शनी कृषि, प्रविधि तथा पर्यटन महोत्सव २०८२’ उद्घाटन गर्दै अर्थमन्त्री खनालले निर्वाचनको विकल्प सोच्नु देशलाई दुर्घटनामा पार्नु भएको बताए ।
‘जबसम्म राजनीतिक स्थिरता हुँदैन, तबसम्म आर्थिक सूचक राम्रो हुन सक्दैन, अहिलेको संकट समाधान गर्न निर्वाचन निर्धारित समयमा गर्नुको विकल्प छैन,’ उनले भने, ‘सरकार निष्पक्ष, स्वतन्त्र र भयरहित निर्वाचन गराउन दृढ छ । सरकारको संकल्पमा दलहरूले सहयोग गर्नुको विकल्प छैन ।’ उनले निर्वाचनका लागि धेरै दल र छिमेकी देशहरूसमेत सकारात्मक रहेको बताए । उनले स्पष्ट नभने पनि घुमाउरो भाषाले कांग्रेस र एमालेलाई निर्वाचनका लागि तयारी गर्न आग्रह गरेका थिए । ‘निर्वाचनका लागि सबै दलको ध्यान जाओस्,’ उनले थपे ।
अर्थमन्त्री खनालले अहिले लगानीको वातावरण बन्दै गएको पनि बताए । कम मूल्यवृद्धि नेपालको इतिहासमा पहिलो पटक भएको उनले दाबी गरे । ‘यो आमउपभोक्तालाई राहत हो । आर्थिक गतिविधि विस्तार भएको छ,’ उनले भने, ‘मुद्रा सञ्चिति वृद्धि र वित्तीय सत्तामा पुँजी सञ्चिति पनि बढेको छ ।’ त्यसैले लगानीका लागि यो भन्दा उपयुक्त वातावरण तयार नहुने उनले बताए । अन्तरिम सरकारले र निजी क्षेत्रको सहकार्यमा तत्काल राहत कार्यक्रम अघि सारेर कार्यान्वयनमा लैजान लागेको पनि उनले बताए ।
उनले बुटवल पहिल्यैदेखि औद्योगिक हव भएकाले त्यसलाई निरन्तरता दिनका लागि सरकारले सबै प्रयास गरिरहेको बताए । उनले आर्थिक क्षेत्र सेज संचालनका लागि सरकारले सहजीकरण गरेको र बुटवलस्थित मोतीपुर औद्योगिक क्षेत्र निर्माणको काम पनि छिट्टै अघि बढाइने बताए ।
पुस ३ गतेदेखि १७ गतेसम्म लाग्ने यो प्रदर्शनीमा ५ सय स्वदेशी उद्योग मात्र रहेको अध्यक्ष कृष्णप्रसाद पराजुलीले बताए । नेपाल उद्योग परिसंघ लुम्बिनीका अध्यक्ष एजाज आलमले औद्योगिक क्षेत्रको व्यवस्थापनका विषयमा सरकारले काम गर्न नसकेको बताए ।
बुटवल उपमहानगरपालिकाका प्रमुख खेलराज पाण्डेले संघीय सरकारले स्थानीय सरकारसँग विकासका योजनामा समन्वय नगरेको गुनासो गर्दै धेरै बजेट फिर्ता गएको विषयमा अर्थमन्त्रीले ध्यानु दिनुपर्ने बताए ।
कार्यक्रममा पूर्वमन्त्री भोजप्रसाद श्रेष्ठ, जिल्ला समन्वय प्रमुख उमाकान्त चपाई, बुटवल उद्योग वाणिज्य संघका अध्यक्ष हरि अर्याल, रूपन्देही पत्रकार महासंघका अध्यक्ष दिनेश पाण्डेलगायतले शुभकामना मन्तव्य व्यक्त गरेका थिए ।
