: अवैध रूपमा सालको काठ ओसारपसार गरेको आरोपमा एकजना पक्राउ परेका छन्। पक्राउ पर्नेमा ३५ वर्षीय विज्ञान नेपाली रहेका छन्।
प्रहरी निरीक्षक कमल नेपालीका अनुसार बुधबार बिहान साढे ५ बजे काठ ओसारपसार गरिरहेको अवस्थामा प्रहरीको विशेष अप्रेसन टोलीले सिद्धार्थ राजमार्गअन्तर्गत फेदिखोला गाउँपालिका-२ सर्केटारी क्षेत्रबाट उनलाई पक्राउ गरेको हो।
सेतीदोभानबाट पोखरातर्फ जाँदै गरेको ग.१ ख ६३८६ नम्बरको मिनी ट्रकमा सालको काठबाट तयार पारिएका ढोका तथा झ्यालका चौकोसहरू अवैध रूपमा ओसारपसार गरिएको भेटिएको प्रहरीको भनाइ छ।
ढोका र झ्यालको ४/४ वटा चौकोससहित १६ दशमलव ८ क्यूबिक फिट नियन्त्रणमा लिइएको छ। प्रहरीले मिनिट्रक चालक आँधीखोला गाउँपालिका-५ का ३५ वर्षका नेपालीलाई नियन्त्रणमा लिई आवश्यक अनुसन्धान सुरु गरेको जनाएको छ। सालको काठसहित डिभिजन वन कार्यालय स्याङ्जामा बुझाइएको छ।
