— मकवानपुरको बकैया गाउँपालिका–७ अन्तर्गत पर्ने फास्टट्र्याकमा मंगलबार भएको ट्याक्टर दुर्घटनामा उपचारको क्रममा थप एक जनाको मृत्यु भएको छ । उपचारको क्रममा हेटौंडा अस्पतालमा बकैया गाउँपालिका–७ का ५० वर्षीय युवराज माझीको मृत्यु भएको हो । यससँगै उक्त दुर्घटनामा मृत्यु हुनेको संख्या तीन जना पुगेको हो ।
बकैया गाउँपालिका–७ अधेरीका केशवलाल माझी र सन्तलाल माझी उपचारका लागि हेटौंडा अस्पताल ल्याउने क्रममा बाटोमा नै मृत्यु भएको थियो । ट्याक्टर दुर्घटनामा १८ जना घाइते भएका छन् ।
खाना खाएर अधेरीस्थित फास्टट्र्याकमा काम गर्ने मजदुरहरु बोकेको लु ५ त १७४ नम्बरको ट्याक्टर मंगलबार दिउँसो दुर्घटना हुँदा २१ जना घाइते भएका थिए । २१ जनामध्ये ३ जनाको मृत्यु भएको प्रहरीले जनाएको छ ।
घाइते १८ जनामध्ये ६ जना हेटौंडा अस्पताल र १२ जना चुरेहिल अस्पतालमा उपचार भइरहेको प्रहरीले जनाएको छ । अधिकांश घाइतेहरुको मध्यम रहेको अस्पतालका चिकित्सिकले बताएका छन् । ट्याक्टरको पछाडिको टेलर नै खसेर दुर्घटना भएको हो ।
