: विराटनगरमा शनिबार ३ हजार किलो गाँजा नष्ट गरिएको छ। विराटनगरका विभिन्न स्थानबाट ३ वर्षको अवधिमा बरामद गरिएको ठूलो परिमाणको गाँजा आगो लगाएर जलाइएको हो।
आर्थिक वर्ष २०७८–०७० देखि चालु आर्थिक वर्ष २०८२–०८३ को हालसम्म इलाका प्रहरी कार्यालय रानी तथा त्यसअन्तर्गतका युनिटहरूले बरामद गरेको गाँजा एकै ठाउँमा संकलन गरी आगो लगाएर नष्ट गरिएको मोरङ प्रहरीका निमित्त प्रमुख एवं डीएसपी कोपिला चुँडालले बताइन्। उनका अनुसार विभिन्न समयमा लागुऔषध कारोबार नियन्त्रणका क्रममा गाँजा बरामद गरेर राखिएको थियो।
आवश्यक प्रक्रिया पूरा गरेर विराटनगर महानगरपालिका–१६ स्थित दरैयामा गाँजा नष्ट गरिएको जानकारी चुँडालले दिइन्। इलाका प्रहरी कार्यालय रानीका इन्स्पेक्टर कविन राई, जिल्ला अदालतका प्रतिनिधि तथा स्थानीय जनप्रतिनिधिको गाँजा एकमुष्ट रूपमा नष्ट गरिएको छ।
ठूलो परिमाणमा गाँजा नष्ट गर्नुले लागुऔषध नियन्त्रणमा प्रहरीको सक्रियता देखिएको स्थानीय जनप्रतिनिधिहरूले बताएका छन्। मोरङ जिल्ला लागुऔषधको ओसारपसार र कारोबारका दृष्टिले संवेदनशील मानिँदै आएको छ। खुला सिमाना र राजमार्ग नजिकका क्षेत्र प्रयोग गरेर गाँजा तथा अन्य लागुऔषध ओसारपसार हुने गरेको छ। गाँजा नष्ट गरिनुलाई लागुऔषध नियन्त्रणतर्फको महत्वपूर्ण कदमका रूपमा लिइएको छ।
