— नेपालमा भदौ २४ गतेको विध्वंशपछि विधिको शासनको ठाउँमा अराजकको शासन चलिरहेको एमालेका उपमहासचिव प्रदीप ज्ञवालीले बताएका छन् ।
एमालेको ११ औँ महाधिवेशनको उद्घाटनका क्रममा ज्ञवालीले जस्तोसुकै परिस्थितिमा पनि पार्टी निरन्तर अगाडि बढ्ने बताए ।
भदौ २४ गते नेपालमाथि शक्तिशाली राष्ट्रले हमला गरेको जस्तो अवस्थामा रहेको ज्ञवालीको भनाइ थियो । 'हामीले चुनौतीपूर्ण अवस्थामा महाधिवेशन आयोजना गर्दैछौं । आजभन्दा ३ महिना अगाडि देशले कल्पना नगरेको विनाशकारी स्थिति सामना गर्यो । सन् १८२६ को सुगौली सन्धिपछि देशले युद्ध लड्नुपरेन । तर भदौ २४ गते काठमाडौं लगायतका मुख्य सहरी केन्द्रको दृश्य नेपालमाथि कुनै शक्तिशाली देशले बम वर्षा गरिरहेको, विनाश गरेको जस्तो अकल्पनीय स्थिति सिर्जना भयो,' उनले भने ।
भदौ २३ र २४ को जेन-जी आन्दोलनपछि जननिर्वाचित ढलेको र जनप्रतिनिधिको संस्था पनि विघटन गरिएको उनले बताए । 'जननिर्वाचित सरकार ढल्यो । जनताका प्रतिनिधिको थलो प्रतिनिधिसभा विघटन भयो । विधिको शासनको ठाउँमा अराजक शासन आयो,' उनले भने ।
अहिले शासनमा रहेकाहरूले अराजकताको शासन चलाइरहेको र उनीहरूका विरुद्धमा वा आलोचनामा बोल्दा पनि खबरदारी आइरहेको ज्ञवालीले बताए । पुराना पार्टी र नेता तथा एमाले समाप्त भयो भन्ने भाष्य बनाइएको भन्दै ज्ञवालीले असन्तुष्टि जनाए । उनले एमालेको महाधिवेशनले एमाले निरन्तर अगाडि बढिरहेको छ र बढिरहन्छ भन्ने सन्देश दिएको बताए ।
