— नेपाली राजपरिवारले बेलायतमा कम्पनी खोल्न लागेको भन्दै ठगी गरेको आरोपमा एक जना पक्राउ परेका छन् । पक्राउ पर्नेमा मनोज कुमार भनिने अनुपकुमार सिंह छन् ।
उपत्यका अपराध अनुसन्धान कार्यालयको टोलीले भागेर भारततर्फ जान लागेको अवस्थामा उनलाई पक्राउ गरेको एसपी काजीकुमार आचार्यले बताए ।
उनले आफूलाई हिमानी ट्रस्टको कर्मचारी समेत बताएर ठगी गर्ने गरेको खुलेको छ । उनले आफूलाई राजपरिवारको निकट रहेको बताउने गरेको पीडितहरुको भनाइ छ ।
सिंहविरुद्ध ४२ जनाले बेलायत लैजाने भन्दै ठगी गरेको आरोपमा निवेदन दिएका छन् । अरु थुप्रै पनि पीडित भएको पाइएको आचार्यले बताए ।
उनी यसअघि पनि ७ पटक ठगी सम्बन्धी कसुरमा मुद्दा चलिसकेको व्यक्ति भएको प्रहरीको भनाइ छ ।
