— दुर्लभ वन्यजन्तु एकसिंगे गैंडा मार्ने मुद्दामा फरार रहेका हेटौंडा उपमहानगरपालिका–३ लेवटका राकेश लामगादे भनेर चिनिने रामशरण विक पक्राउ परेका छन् ।
चितवन राष्ट्रिय निकुञ्ज कार्यालय र निकुञ्जमा सुरक्षाका लागि तैनाथ नेपाली सेनाको नयाँ गोरख गणको संयुक्त टोलीले बिहीबार विकलाई चितवन खैरहनी नगरपालिका–६ पुरानो पर्साबजार ईलाकाबाट नियन्त्रणमा लिएको हो ।
‘उनलाई नियन्त्रणमा लिएर अदालतमा पेश पनि गरिसकेका छौं,’ चितवन राष्ट्रिय निकुञ्ज कार्यालयका सूचना अधिकारी रहेका संरक्षण अधिकृत अविनाश थापा मगरले भने । उनी पटक पटक गैंडा मुद्दामा पक्राउ परेर सजाय पनि पाएका व्यक्ति रहेको सूचना अधिकारी थापा मगरले बताए । पछिल्लो पटक विक हतियारसहित चितवन निकुञ्ज प्रवेश गरेका थिए ।
निकुञ्ज कार्यालय स्रोतका अनुसार गएको असरा २९ गते निकुञ्जको पूर्वी क्षेत्रमा दुईजना व्यक्ति हतियारसहित निकुञ्ज छिरेको दृश्य निकुञ्ज क्षेत्रमा राखेको विशेष क्यामेरामा कैद भएको थियो । त्यसमध्येका एकजना पहिल्यै समातिएका थिए । उनीसँगै गएका विक फरार थिए । प्रहरीको केन्द्रीय अनुशन्धान ब्यूरो (सिआईबी)समेतको सहयोगमा निकुञ्जले विकलाई समाएको हो ।
विकसमेतलाई प्रतिवादी बनाएर चितवन अदालतमा गैंडा मार्ने उद्योग (प्रयास गरेको)मा मुद्दा दायर भइसकेको छ । विकलाई यसअघि चितवन निकुञ्जले गैंडा मुद्दामा २०६७ सालमा १५ वर्ष कैद हुने फैसला गरेको थियो । सर्वोच्च अदालतले त्यसलाई १० वर्षमा घटाएको थियो । कैद भुक्तान गरी छुटेका बिक फेरि गैंडा मार्न परिचालित भएको निकुञ्जको भनाइ छ ।
