— विशेष अदालतले सघन सहरी तथा भवन निर्माण आयोजनाको कार्यालय, ओखलढुङ्गामा कार्यरत इन्जिनियर सन्तोषकुमार यादवलाई भ्रष्टाचार मुद्दामा दोषी ठहर गरेको छ । न्यायाधीशहरू नारायणप्रसाद पौडेल,हेमन्त रावल र विदुर कोइरालाको इजलासले दोषी ठहर गरेको हो ।
१ जेठ २०८२ मा अख्तियार दुरुपयोग अनुसन्धान आयोगको टोलीले ओखलढुङ्गामा कार्यरत इन्जिनियर सन्तोषकुमार यादवलाई ५ लाख ७० हजार रुपैयाँ घुससहित पक्राउ गरेको थियो । अदालतमा बयानका क्रममा यादवले आफूले घुस लिएको स्वीकार गरेपछि अदालतले दोषी ठहर गरेको हो ।
खोटाङ जिल्लामा निर्माणाधीन सडकको रनिङ बिल भुक्तानीका लागि यादवले सेवाग्राहीसँग घूस मागेका थिए । सूचनाका आधारमा आयोगको टोलीले यादवलाई भक्तपुरको मध्यपुर ठिमी नगरपालिका-१, लोकन्थलीबाट उक्त रकमसहित पक्राउ गरेको थियो ।
उनीविरुद्ध विशेषमा भ्रष्टाचार मुद्दा दायर भएको थियो । उक्त मुद्दामा फैसला सुनाउदै अदालतले दोषी ठहर गरेको हो ।
