— भ्रमणमा काठमाडौं आएका इजरायली नागरिकमाथि कुटपिटमा संलग्न दुई जना पक्राउ परेका छन् ।
प्रहरी वृत्त लैनचौर, सोह्रखुट्टेबाट खटिएको प्रहरी टोलीले आइतबार साँझ सवा सात बजे काठमाठौंको ठमेलबाट उनीहरुलाई पक्राउ गरेको हो ।
पक्राउ पर्नेमा काभ्रपलान्चोकको तेमाल गाउँपालिका–६ घर भइ हाल काठमाडौंको स्वयम्भूमा बस्दै आएका २६ वर्षीय पेम्बा तामाङ, र नुवाकोटको ताँदी गाउँपालिका–४ घर भइ स्वयम्भूमा नै बस्दै आएका ३० वर्षीय आएका श्याम तामाङ रहेका छन् ।
मंसिर १५ गते राति १० बजेतिर काठमाडौं–१६ कालधारास्थित बाटोमा हिँड्दै गरे्का इजरायली नागरिक अल्मोग आर्मोजामाथि हातपात गर्नुका साथै लछारपछार गरिएको थियो । उक्त घटना सार्वजनिक भएपछि पर्यटकमाथि भएको उक्त आक्रमणलाई लिएर सर्वत्र आलोचना भएको थियो । पक्राउ परेका दुवै जनाविरुद्ध अनुसन्धान भइरहेको प्रहरीले जनाएको छ ।
नेपालमा ट्रेकिङका लागि आएको इजरायली नागरिक कुटिएपछि जेरुसेलमका सञ्चारमाध्यमहरुले ‘इजरायली नगारिक भएकै कारण कुटिएको’ भन्दै समाचार लेखेका थिए । पीडित अल्मोग आर्मोजाले जेरुसेलम पोस्टसँग भनेका छन्, ‘आक्रमणकारीले मलाई हिब्रु भाषमा बोलेको सुनिरहेका थिए, उनीहरूको पहिलो प्रहारले नै मलाई बेहोस बनाएको भए परिणाम फरक हुनसक्थ्यो ।’ यदि आफू भाग्न नसकेको भए ज्यान बच्छ, बच्दैन ठेगान नभएको समेत उनले भनेका छन् ।
कुटिएलगत्तै उनी सुरुमा नयाँबजारस्थित पिपुल्स अस्पताल र पछि मैतिदेवीस्थित स्वेग अस्पतालमा भर्ना भएका थिए, उपचारपछि उनी डिस्चार्ज भएका थिए ।
