: जेनजी आन्दोलनका क्रममा सिन्धुलीका सरकारी कार्यालयहरूमा तोडफोड र आगजनी गर्नेमध्ये १५ जनालाई प्रहरीले पक्राउ गरेको छ। गत भाद्र २३ र २४ गते देशैभरी भएको जेनजी आन्दोलनका क्रममा सिन्धुलीमा पनि झण्डै एक दर्जन सरकारी कार्यालयमा तोडफोड र आगजनी गरिएको थियो।
उक्त विध्वंसमा संलग्न मध्ये हालसम्म १५ जनालाई नियन्त्रणमा लिएर अनुसन्धान थालिएको जिल्ला प्रहरी कार्यालयले जनाएको हो। कार्यालयमा सोमबार पत्रकार सम्मेलन आयोजना गर्दै सिन्धुलीका प्रहरी प्रमुख लालध्वज सुवेदीले सरकारी सम्पति माथि तोडफोड र आगजनी गर्ने, लुटपाट गर्ने मध्ये हालसम्म १५ जनालाई नियन्त्रणमा लिएर अनुसन्धान थालिएको जानकारी दिएका हुन्।
पक्राउ पर्नेहरूमा कमलामाई नगरपालिका ६ का वर्ष २० का सुजन साह, सोही ठाउँका वर्ष ३६ का रत्नबहादुर श्रेष्ठ, कमलामाई नगरपालिका ५ का वर्ष ४७ का फौद थापामगर, तीनपाटन गाउँपालिका ४ का वर्ष ३० का सुजन गौतम, रामनगर गाउँपालिका ६, सर्लाहीका वर्ष २५ का पपु कुमार साह, कमलामाई नगरपालिका ५, सिन्धुलीका वर्ष २७ का रबन चौधरी, कमलामाई नगरपालिका १२ का वर्ष ३१ का क्षितिज श्रेष्ठ रहेका छन्।
यस्तै कमलामाई नगरपालिका ४ का वर्ष २४ का सविन लामा, गौशला नगरपालिका २, महोत्तरीका राजु महरा, भारत देश सितामढी जिल्ला घर भई हाल कमलामाई नगरपालिका ६ धुराबजार बस्ने वर्ष २२ का देवनंदन साह, कमलामाई नगरपालिका १२ का वर्ष २३ का डोर बहादुर सार्की, तीनपाटन गाउँपालिका ११ का वर्ष २५ का होम बहादुर लुङ्गेली, कमलामाई नगरपालिका ८ का ३४ वर्षका ओम बहादुर खत्री, मरिण गाउँपालिका ७ घरभई हाल कमलामाई नगरपालिका ४ धुराबजार बस्ने वर्ष ३० का कमल पाख्रिन र बर्दिबास नगरपालिका १४, महोत्तरीका ३५ वर्षिय हरिचन सोनार छन्।
