: अमेरिकी सर्वोच्च अदालतले अमेरिकामा जन्मेका बालबालिकालाई नागरिकताको संवैधानिक अधिकार छ कि छैन भनेर निर्धारण गर्ने मुद्दाको सुनुवाइ गर्न सहमति जनाएको छ।
अमेरिकी राष्ट्रपति डोनाल्ड ट्रम्पले पदभार ग्रहण गरेको पहिलो दिन एक आदेशमा हस्ताक्षर गरेका थिए।
यो आदेशले देशमा अवैध रूपमा बसोबास गर्ने आमाबाबुबाट जन्मेका बच्चालाई जन्मसिद्ध नागरिकता दिने प्रणालीको अन्त्य गर्ने अपेक्षा गरिएको थियो। तर तल्ला अदालतले यो निर्णयलाई रोक लगाएका थिए।
सर्वोच्च अदालतमा मुद्दाको सुनुवाइको मिति अझै तय भएको छैन भने अन्तिम निर्णय आउन धेरै महिना लाग्न सक्ने विश्वास गरिएको छ।
अदालतको यो निर्णयले ट्रम्पको आप्रवासन नीति र अमेरिकी नागरिकताको अर्थ दुवैमा गहिरो प्रभाव पार्न सक्छ।
करिब १६० वर्षदेखि अमेरिकी संविधानको १४ औं संशोधनले देशमा जन्मने प्रत्येक बच्चा अमेरिकी नागरिक हो भन्ने सिद्धान्तलाई स्थापित गर्दै आएको छ। तर यो नियम कूटनीतिज्ञ र विदेशी सैन्य कर्मचारीका बच्चामा लागू हुँदैन।
