: नेपाल प्रिमियर लिग (एनपीएल) मा सुदूरपश्चिम रोयल्स अपराजित रहँदै पहिलो क्वालीफायर खेल्ने भएको छ। त्रिवि क्रिकेट मैदानमा बिहीबारको दोस्रो खेलमा सुदूरपश्चिम रोयल्सले चितवन राइनोजलाई ४९ रनले पराजित गरेको हो।
सुदूरपश्चिमले अपराजित रहँदै १२ अंकसहित प्लेअफको पहिलो क्वालिफायर खेल्ने पक्का भएको हो। हाल तालिकामा ८ अंकसहित तेस्रो स्थानमा रहेको विराटनगर पनि प्लेअफ पुगेको छ।
यो जितसँगै प्लेअफका ३ टोलीको टुंगो लागेको छ। सुदूरपश्चिम रोयल्स, काठमान्डु गोर्खाज र विराटनगर किंग्सले प्लेअफमा स्थान बनाएका हुन्। अब प्लेअफमा १ स्थान बाँकी छ।
टस हारेर पहिले ब्याटिङ गरेको सुदूरले निर्धारित २० ओभरमा ४ विकेट गुमाउँदै १६९ रन बनाएको थियो।
सुदूरपश्चिम रोयल्सले दिएको १७० को विजयी लक्ष्य पछ्याएको चितवनले १७.१ ओभरमा १२० रन बनाउँदै अलआउट भएको हो।
चितवनका लागि रवि बोपाराले सर्वाधिक २९ रन बनाए। उनले २३ बलमा १ चौका र २ छक्का प्रहार गरे।
ओपनर डेविड मलान ६ रनमा राआउट भए। दोस्रो विकेट अर्जुन साउद १६ रनमा क्याच भए। सैफ जैब ६ रनमा क्याच भए। देव खानलले २८ रन बनाए। कप्तान कुशल मल्लले १५ रन बनाए। त्यसपछिका कुनैपनि ब्याटरले दोहोरो अंकमा रन बनाउन सकेनन्।
सुदूरपश्चिम रोयल्सका लागि पुनित महराले ३ विकेट लिए। दीपेन्द्र सिंह ऐरी, हिक्मत महरा, अभिनाश बोहोरा र इशान पाण्डेले १–१ विकेट लिए।
पहिलो इनिङ्समा ब्याटिङ गरेको सुदूरपश्चिम रोयल्सका लागि क्रिस लिनले सर्वाधिक ७५ रन बनाएर रिटायर हर्ट भए। उनले ५६ बलमा ५ चौका र ३ छक्का प्रहार गरे।
सुदूरले पहिलो विकेट विनोद भण्डारीको रूपमा गुमायो। उनले १७ बलमा २१ रन बनाए। उनले पहिलो विकेटको लागि क्रिस लिनसँग ४६ रनको साझेदारी बनाए।
इशान पाण्डे १ रनमा क्याच भए। पुनित महराले १३ रन बनाए। हर्मित सिंह १ रनमै पेभेलियन फर्किए।
आरिफ शेख २४ र दीपेन्द्र सिंह ऐरी २४ रनमा अविजित रहे।
चितवन राइनोजका लागि सैफ जैबले २ विकेट लिए। रञ्जित कुमार र जर्ज स्क्रिमसले १–१ विकेट लिए।
सुदूरपश्चिम यसअघि नै प्लेअफमा छनोट भइसकेको थियो। यसअघि, सुदूरपश्चिमले ५ खेलमा ५ जिसहित प्लेअफमा स्थान सुरक्षित गरिसकेको छ। पहिलो खेलमा सुदूरपश्चिम रोयल्सले काठमान्डु गोर्खाजलाई २९ रनले हराएको थियो। दोस्रो खेलमा पोखरा एभेन्जर्सलाई १८ रन, तेस्रो खेलमा कर्णाली याक्सलाई ४५ रन, चौथो खेलमा लुम्बिनी लायन्सलाई ७ विकेट र पाँचौं खेलमा जनकपुर बोल्ट्सलाई ६ विकेटले हराएको थियो।
चितवन राइनोजले पाँच खेल खेलिसक्दा २ जित्दा तिन खेलमा हार बेहोरेको हो। पहिलो खेलमा कर्णाली याक्सलाई ४ विकेटले हराएको चितवनले दोस्रो खेलमा लुम्बिनी लायन्ससँग ६ विकेटको हार बेहोरेको थियो। तेस्रो खेलमा विराटनगरलाई ४८ रनले हराएको थियो। चौथो खेलमा काठमान्डु गोर्खाजसाग ५३ रनले पराजित हुँदा पाँचौं खेला जनकपुर बोल्ट्ससँग ६ विकेटको हार बेहोरेको थियो।
