: राष्ट्रिय स्वतन्त्र पार्टी (रास्वपा) र विवेकशील साझा पार्टीबीच एकता भएको छ। आइतबार काठमाडौंको राष्ट्रिय सभागृहमा आयोजित एक कार्यक्रमका बीच पार्टी एकताको घोषणा गरिएको हो। कार्यक्रममा रास्वपाका तर्फबाट कार्यवाहक सभापति डोल प्रसाद अर्याल र उपसभापति डा. स्वर्णिम वाग्ले तथा विवेकशील साझाका तर्फबाट अध्यक्ष समीक्षा बाँस्कोटा र उपाध्यक्ष प्रकाशचन्द्र परियारले ५ बुँदे सहमतिपत्रमा हस्ताक्षर गरेका हुन्।
एकतापछि समायोजनका सन्दर्भमा, रास्वपाको आगामी राष्ट्रिय महाधिवेशनसम्मका लागि संघीय नेतृत्व मञ्च नामक विशेष संयन्त्र निर्माण गरिने सहमति भएको छ। प्रदेश र स्थानीय तहका संरचनामा पनि योग्यता, समावेशिता र सार्वजनिक छविका आधारमा नेता तथा कार्यकर्ताहरूको समुचित समायोजन गरिने सहमति भएको छ।
कार्यक्रममा कार्यवाहक सभापति डोल प्रसाद अर्यालले देशमा भ्रष्टाचारको अन्त्य गर्दै सुशासनको आशा गरेर बसेको जनताहरूको पक्षमा एकताबद्ध भएर अघि बढ्ने बताए। रास्वपासँग जनताले गरेको अपेक्षालाई निराश हुन नदिने उनले उल्लेख गरे। उनले तत्कालीन सरकारले प्रतिशोध साधेको र न्यायलयमाथि पनि राजनीतिकरण गरेर पार्टी सभापतिलाई फसाउने काम गरेको आरोप लगाए। उनले वर्तमान सरकारलाई निर्वाचन सम्पन्न गर्न सहयोग गर्ने भन्दै परिवर्तनका पक्षधरलाई वर्तमान सरकारले उपेक्षा गरे सडकमा आउन बाध्य हुने चेतावनी दिए।
त्यस्तै रास्वपामा समाहित भएपछि विवेकशील साझाका अध्यक्ष समीक्षा बाँस्कोटाले आफूहरू रास्वपामा विलय भएको नभइ आगामी प्रतिनिधिसभाको निर्वाचनका लागि प्रलय भएको बताइन्। उनले पदको बार्गेनिङबाट नभइ देश र जनतालाई केन्द्रमा राखि युवाहरूले अघि सारेका मुद्दालाई स्थापित गर्न एकताबद्ध भएको जिकिर गरिन्। वैकल्पिक राजनीति गर्न चाहने दल, समूह लगायतलाई एकताबद्ध हुने उनले आह्वान गरे।
त्यस्तै दुई पार्टीबीच एकीकरण प्रक्रियालाई कानुनी रूप दिन निर्वाचन आयोगका प्रक्रियाहरू पूरा गर्ने र दुवै पार्टीका नाममा रहेका चल–अचल सम्पत्तिको व्यवस्थापन आपसी समझदारीमा शीघ्र सम्पन्न गर्ने सहमति भएको छ। लोकतान्त्रिक सुशासन र समुन्नतिका मुद्दामा गोलबद्ध हुन अन्य सुसंस्कृत एवं परिवर्तनगामी शक्ति, समूह र व्यक्तिहरूलाई घण्टी चुनाव चिह्नमा समाहित हुन आह्वान समेत गरिएको छ।
