— लेबनानको सैन्य समुह हिजबुल्लाहका शीर्ष कमाण्डरको अन्त्येष्टीमा सोमबार हजारौं मानिसहरु सहभागी भएका छन् ।
अन्त्येष्टीमा सहभागी भएकाहरुले इजरायलको आक्रमणको निन्दा गरेका छन् । उनीहरुले इरानका सर्वोच्च नेता अयातोल्लाह अली खामेनाईको पक्षमा नाराबाजी गरेको इजरायली सञ्चारमाध्यम टाइम्स अफ इजरायलले जनाएको छ ।
यसअघि आइतबार इजरायलले लेवनानको राजधानी बेरुतस्थित हरेत हेरिक इलाकामा आक्रमण गर्दा हिजबुल्लाहका सैन्य प्रमुख हायथाम अली ताबावावाइसहित ५ जनाको मृत्यु भएको थियो ।
हायथाम अली सैइयद अबु अली नामले पनि चिनिन्छन् । इजरायली सञ्चारमाध्यमका अनुसार यसअघि पनि दुईपटक उनको ज्यान लिनेगरी हमला भएको थियो । जो असफल भयो ।
नोभेम्बर २०२४ मा अमेरिकाको मध्यस्थतामा इजरायल र हिजबुल्लाहबीच युद्धविराम भएको थियो । तर इजरायलले त्यसलाई बारम्बार उल्लंघन गरेको संयुक्त राष्ट्रसंघका विज्ञहरुले बताइरहेका छन् ।
पछिल्लो हवाई हमलाले लेबनानमा अवस्था बिग्रनसक्ने भन्दै फ्रान्सले चिन्ता प्रकट गरेको छ । सोमबार फ्रान्सको विदेश मन्त्रालयले जारी गरेको विज्ञप्तिमा युद्धविराम अनुगमन संयन्त्रमार्फत संभावित मुडभेडलाई रोक्नेगरी काम गर्न र एकपक्षीय कदम नचाल्न आग्रह गरिएको छ ।
पछिल्ला केही सातायता लेबनानमा इजरायलले लगातार हवाई हमला गरिरहेको छ । इजरायल र अमेरिकाले हिजबुल्लाहलाई निसस्त्रीकरण गर्न लेबनानलाई दबाब पनि दिइरहेका छन् ।
हिजबुल्लाहले युद्धविरामको फाइदा उठाएर आफ्नो सैन्य सामथ्र्य बढाउने प्रयास गरेको इजरायलको आरोप छ । हिजबुल्लाहलाई निशस्त्रीकरण गर्ने विषयमा समर्थन दिएको लेबनान सरकारले इजरायलका आरोप भने अस्विकार गर्दै आएको छ ।
