: जेनजी आन्दोलनका क्रममा गत भदौ २४ गते प्रहरीको हतियार लुटपाटमा संलग्न रहेका तीनजनालाई दुई थान चाइना मेक पेस्तोल र २० राउन्ड गोलीसहित पक्राउ गरिएको छ। झापा र इलामका विभिन्न स्थानबाट उनीहरूलाई पक्राउ गरिएको कोशी प्रदेश प्रहरी कार्यालयका निमित्त प्रहरी प्रमुख एसएसपी दिपक पोखरेलले बताए ।
पक्राउ परेका अभियुक्तले गत भदौ २४ गतेको जेनजी आन्दोलनमा काठमाडौंस्थित महानगरीय प्रहरी कार्यालयमा तोडफोड र आगजनी गरी हातहतियार लुटेर फरार भएका थिए । उनीहरूलाई विशेष सूचनाका आधारमा इलाका प्रहरी कार्यालय दमक र लागूऔषध नियन्त्रण ब्युरो काँकडभिट्टाबाट खटिएको टोलीले दमक–८ का सरोज पुरीलाई १ थान पेस्तोल र १५ राउन्ड गोलीसहित पक्राउ गरेको हो ।
पुरीले लुटेको अर्को पेस्तोल दमक–६ का विश्व लिङ्देनलाई दिएको र लिङ्देनले उक्त हातहतियार इलाम चुलाचुली–४ का पवन हाङ्सुरुम्वालाई लुकाइ राख्न दिएको खुल्न आएपछि प्रहरी टोलीले पवनलाई बारीमा खाल्डो खनेर राखेको अवस्थामा पेस्तोल र ५ राउन्ड गोलीसहित पक्राउ गरिएको एसएसपी पोखरेलले बताएका छन्। उनले पक्राउ परेकाहरूमाथि थप अनुसन्धान भइरहेको बताए ।
लुटिएको प्रहरीको पेस्तोल फेला पार्न प्रदेश प्रहरी सक्रिय देखिएको बेला सुनसरीमा भने जेनजी आन्दोलनका क्रममा सरकारी कार्यालय,व्यवसायिक भवन र निजी घरमा भएको आगजनीका पीडित आजसम्म न्यायको प्रतीक्षामै छन् ।
पीडितहरूले सुनसरी प्रहरीमा किटानी जाहेरी दिएको भएपनी क्षतिपूर्ति मूल्यांकन र दोषी पहिचानका प्रक्रिया अघि नबढेको भन्दै खुला रूपमा गुनासो व्यक्त गर्दै आएका छन्। घटनापछिको क्षतिपूर्ति तथा कारबाही प्रक्रिया अघि नबढ्नु प्रहरीको दोहोरो मापदण्डको प्रश्न उठ्न थालेको उनीहरूको आरोप छ।
एकातिर प्रहरी आफ्नै संगठनबाट लुटिएको हातहतियार फेला पार्न सक्रिय भएपनि जनताको धन–सम्पत्तिमा गरिएको आगजनीका घटनामा ढिलासुस्ती हुनु दु:खद भएको नेपाली कांग्रेस कोशीका महामन्त्री उमेश थापाले बताए ।
उनले तत्काल प्रहरीले जाहेरी दर्ता गरि कानुनी कारबाही गर्न माग गरेका छन् । सुनसरीका प्रहरी प्रमुख एसपी केशव कुमार थेबेले उजुरी दर्ता गरि कानुनी कारबाहीको प्रक्रिया अगाडि बढाइने आश्वासन दिएका छन् ।
