: जनता समाजवादी पार्टी (जसपा)का उपमहासचिव प्रदीप यादवले नेपाली कम्युनिस्ट पार्टीसँगको एकता गर्ने च्याप्टर क्लोज भएको बताएका छन्।
जसपाका संघीय परिषद् अध्यक्ष राजेन्द्र श्रेष्ठसहितका ६ जना नेताहरूले पार्टी छाडेर पुष्पकमल दाहाल ʻप्रचण्डʼ संयोजक रहेको नेपाली कम्युनिस्ट पार्टीमा जाने निर्णय गरेपछि उपमहासचिव यादवले उक्त पार्टीसँग अब एकताको च्याप्टर क्लोज भएको बताएका हुन्।
आइतबार साँझ अन्नपूर्ण पोष्टसँग कुरा गर्दै यादवले पार्टीका राष्ट्रिय अध्यक्ष अशोक राई, महासचिव इस्तियाक राइने, आफूसहित बहुसंख्यक पदाधिकारी र सदस्य तथा सबै ७ जना निवर्तमान प्रतिनिधिसभा सदस्यले नेपाली कम्युनिस्ट पार्टीसँग एकता नगर्ने अडानमा रहेपनि अध्यक्ष श्रेष्ठसहित ६ जनाले एकता गर्ने अड्डी कसेर उता जान निर्णय गरेको बताए।
१५ सदस्यीय केन्द्रीय कार्यकारिणी समितिमा ९ जना एकताको विपक्षमा भएपछि बहुमत नपुगेर श्रेष्ठसहितका ६ जनामात्रै नेपाली कम्युनिस्ट पार्टीमा जान लागेको उनले बताए।
उपमहासचिव यादवले भने,ʻबहुसंख्यक नेता नेपाल कम्युनिस्ट पार्टीसँग पार्टी एकताको विपक्षमा थियौँ। तत्कालका लागि मोर्चा मात्रै बनाएर वा कार्यगत एकता मात्रै गरेर वा चुनावी तालमेल गरेर अगाडि जाऊँ भन्ने मत हाम्रो थियो । तर श्रेष्ठले पार्टी एकता नै गर्नुपर्छ भन्ने अडानमा रहनुभयो। तर उहाँहरूको पक्षमा बहुत नपुगेपछि पार्टी छाडेर जान लाग्नु भएको हो। यसमा हामीले रोक्ने कुरापनि आएन।ʼ
यादवले श्रेष्ठले पार्टी छाडेर गएपछि अब पार्टीको आगामी रणनीतिबारेमा आफूहरु छलफलमा रहेको जानकारी दिए।
नेपाल कम्युनिस्ट पार्टीमा जाने निर्णय गर्नेमा जसपा संघीय परिषद् अध्यक्ष राजेन्द्र श्रेष्ठ, उपाध्यक्षद्वय रणध्वज लिम्बु (कन्दङ्वा) र परशुराम बस्नेत, केन्द्रीय सल्लाहकार समितिका सदस्य दुर्गामणि देवान, केन्द्रीय विज्ञ परिषद् अध्यक्ष डा. पुष्पराज राजकर्णिकार, केन्द्रीय अनुशासन आयोगका अध्यक्ष कृष्णबहादुर घजु रहेका छन्।
