: सुनसरीको झुम्का कारागारबाट भागेका एक जना कैदी शनिबार बिहान मोरङबाट पक्राउ परेका छन्। जेनजी आन्दोलनको मौका छोपेर फरार भएका मोरङको सुन्दरहरैँचा नगरपालिका–४ का ३० वर्षीय वविनारायण चौधरीलाई प्रहरीले पक्राउ गरेको हो। चौधरी कर्तव्य ज्यान मुद्दामा जन्मकैदको सजाय भुक्तान गरिरहेका कैदी हुन्। चौधरीलाई घरनजिकैबाट शनिबार बिहान ८:५० बजेतिर पक्राउ गरिएको जानकारी मोरङ प्रहरी प्रमुख एसपी कवित कटवालले दिए।
चौधरीलाई कर्तव्य ज्यान मुद्दामा अदालतले २५ वर्ष (जन्मकैद) कैद हुने फैसला सुनाएको थियो। झुम्का कारागारमा सजाय भुक्तान गरिरहेका उनी जेनजी आन्दोलनको मौका छोपेर गत भदौ २४ गते भागेका थिए। विशेष सूचनाका आधारमा मोरङको अस्थायी प्रहरी पोस्ट बलियाबाट खटिएको असई (प्रहरी सहायक निरीक्षक) रमेश खतिवडा नेतृत्वको टोलीले उनलाई पक्राउ गरेको एसपी कटवालले बताए।
पक्राउ परेका चौधरीमाथि प्रहरीले थप अनुसन्धान अघि बढाएको छ। जेनजी आन्दोलनको मौका छोपेर र अन्य समयमा फरार रहेका प्रतिवादीलाई पक्राउ गर्नका लागि मोरङमा विशेष अभियान सञ्चालन गरिएको जानकारी एसपी कटवालले दिए। त्यस्तै, लागुऔषध मुद्दामा फरार रहेका एक जनालाई प्रहरीले मोरङको मिक्लाजुङ गाउँपालिका–३ बाट पक्राउ गरेको छ।
लागुऔषध सम्बन्धी चालु मुद्दामा जिल्ला अदालत मोरङबाट प्रहरीले पक्राउ अनुमति लिएर मिक्लाजुङ–३ का २१ वर्षीय करण खिनाल दर्जीलाई पक्राउ गरेको हो। शुक्रबार साँझ पक्राउ परेका दर्जी केही समयदेखि फरार थिए। एसपी कटवालका अनुसार दर्जीलाई इलाका प्रहरी कार्यालय उर्लाबारीको हिरासतमा राखेर अनुसन्धानको बाँकी प्रक्रिया अघि बढाइएको छ।
