: युक्रेनका सहयोगीले रूस र युक्रेनबीचको युद्ध रोक्नका लागि अमेरिकी शान्ति योजनाबारे छलफल गर्ने भएका छन्। दक्षिण अफ्रिकामा हुने जी२० शिखर सम्मेलनमा अमेरिकाको शान्ति योजनामा उनीहरूबीच छलफल हुने भएको हो।
बेलायती प्रधानमन्त्री केयर स्टारमरले युक्रेनका सहयोगीले युद्ध अन्त्य गर्ने अमेरिकाको प्रयासलाई बलियो बनाउने बताए। युक्रेनी राष्ट्रपति भोलोडिमिर जेलेन्स्कीले अमेरिकी योजना स्वीकार गर्ने दबाबका कारण युक्रेन आफ्नो इतिहासको सबैभन्दा कठिन क्षणबाट गुज्रिरहेको बताए।
शुक्रबार जेलेन्स्कीले केयर स्टारमरका साथै फ्रान्स र जर्मनीका नेतासँग फोनमा कुरा गरे। मिडियामा चुहावट भएको यो शान्ति योजनामा युक्रेनका लागि पनि उसले पहिले नै अस्वीकार गरेको सर्त राखिएको छ।
२८ बुँदे योजनामा युक्रेनको पूर्वी डोनेट्स्क क्षेत्रबाट फिर्ता, सेना घटाउने र कहिल्यै पनि नेटोमा सामेल नहुने ग्यारेन्टी जस्ता सर्त छन्। रुसले २०२२ मा युक्रेनमा पूर्ण आक्रमण सुरु गरेको थियो। हाल, यसले युक्रेनको २० प्रतिशत भूभाग ओगटेको छ।
