— नेपाल एसिया कप छनोट तेस्रो चरणको मंगलबार क्वालालम्पुरमा भएको खेलमा मलेसियासँग १–० ले पराजित भएको छ ।
मलेसियाले पूरा खेल अवधिमा लगातार आक्रमण बुने पनि नेपाल साँघुरो हार निकाल्न सक्षम रह्यो ।
खेलको एक मात्र गोल फैसल हलिमले ५६ औं मिनेटमा गरे । नेपालका अधिकांश खेलाडी रक्षात्मक भूमिकामा रहे र गोलरक्षक तथा कप्तान किरण लिम्बूले पनि लगातार शृंखलाबद्ध बचाउ गरे ।
तेस्रो चरणको छनोटमा नेपालका यो लगातार पाँचौं हार हो र शून्य अंकमा चार टिममध्ये पुछारमा छ । मलेसियाको भने यो लगातार पाँचौं जित हो । यससँगै १५ अंकमा मलेसिया अबको एसिया कपमा छनोटको नजिक पुगेको छ ।
नेपाल खेलको अन्त्यमा दस खेलाडीमा सीमित रहेको थियो । लाकेन लिम्बू रातो कार्ड खाएर मैदान छाड्न बाध्य रहे । त्यसमै मलेसियाले पेनाल्टी पनि पाएको थियो, तर पाओलो गोल गर्न चुके र उनको प्रहार बाहिरिएको थियो ।
