— नेपालको खेल पर्यटन प्रवर्द्धनका लागि नेपाल पर्यटन बोर्ड र क्रिकेट संघ नेपालबीच नेपाल प्रिमियर लिग सिजन–२ (एनपीएल–२) लाई सहयोग गर्ने समझदारी भएको छ। यस साझेदारीमार्फत एनपीएल–२ लाई नेपालमा क्रिकेट र खेलकुद पर्यटनको प्रमुख प्लेटफर्मका रूपमा स्थापित गर्ने लक्ष्य राखिएको छ।
समझदारीअनुसार, बोर्डले एनपीएल–२ को ब्रान्डिङ, प्रचार र अन्तर्राष्ट्रिय पहुँच बढाउन सक्रिय भूमिका खेल्नेछ। छोटो समयमै अन्तर्राष्ट्रिय स्तरको विश्वसनीय फ्रेन्चाइज क्रिकेट लिगको रूपमा स्थापित भएको एनपीएल–२ले नेपालमा क्रिकेट प्रेमी, विदेशी खेलाडी, कमेन्टेटर तथा खेलकुदमा रुचि राख्ने पर्यटकलाई आकर्षित गर्ने महत्वपूर्ण माध्यमको रूपमा काम गर्नेछ।
बोर्डका अधिकारीहरूले नेपाललाई क्रिकेटमार्फत अन्तर्राष्ट्रिय स्तरका इभेन्ट आयोजना गर्न सक्ने प्रमुख खेलकुद गन्तव्य बनाउने योजना रहेको बताए।
एनपीएल–२ को प्रत्यक्ष प्रसारण स्टार स्पोर्ट्सबाट हुने भएकोले विश्वभरका करोडौँ दर्शकसम्म नेपालको क्रिकेट र खेलकुद पर्यटनको प्रचार हुने बोर्डको विश्वास छ। त्यस्तै नेपालभित्र कान्तिपुर म्याक्सले समेत एनपीएलको प्रत्यक्ष प्रसारण गर्दैछ ।
बोर्डका प्रमुख कार्यकारी अधिकृत दीपक राज जोशीले भने, ‘एनपीएल–२ नेपालको लागि विश्वमञ्चमा स्थापित हुने ठूलो अवसर हो। यसले नेपालको भौगोलिक र प्राकृतिक विविधतालाई अन्तर्राष्ट्रिय दर्शकसमक्ष प्रभावकारी रूपमा प्रस्तुत गर्नेछ।’ उनले नेपाल अन्तर्राष्ट्रिय खेलकुद प्रतियोगिताका लागि आकर्षक गन्तव्य बन्न लागेको पनि उल्लेख गरे।
क्यानका महासचिव पारसले पनि सहकार्यप्रति खुशी व्यक्त गर्दै भने, ‘खेलकुद र पर्यटन दुबैलाई सँगै अघि बढाउन नेपाल पर्यटन बोर्डसँग हातेमालो गर्न पाउँदा हामी उत्साहित छौँ। पछिल्ला वर्षमा क्रिकेटको उभारले देशलाई विश्वभर प्रवर्द्धन गर्न महत्वपूर्ण भूमिका खेलेको छ, र एनपीएल–२ यसलाई अझ उचाइमा पुर्याउनेछ।’
अन्तर्राष्ट्रिय खेलाडी, विश्वस्तरका कमेन्टेटर र उच्च गुणस्तरको प्रसारणसहित एनपीएल–२ले नेपालले विश्व–स्तरीय खेलकुद कार्यक्रम आयोजना गर्न सक्ने क्षमता देखाउने अपेक्षा गरिएको छ। बोर्डका वरिष्ठ प्रबन्धक सूर्य थपलियाका अनुसार, लिगले फ्रेन्चाइज खेलकुदमार्फत नेपालमा पर्यटन अवसरहरू विस्तार गर्न, विविधता थप्न र नेपाललाई आकर्षक ‘स्पोर्ट्स टुरिज्म डेस्टिनेशन’का रूपमा स्थापित गर्न मद्दत गर्नेछ।
एनपीएल–२ को सफलताले नेपालले आफ्नो क्रिकेट क्षमता मात्र होइन, मनमोहक गन्तव्य, साहसिक अनुभव र सांस्कृतिक समृद्धि पनि विश्वसामु प्रस्तुत गर्दै दक्षिण एसियाको उदाउदो खेल पर्यटन हबको रूपमा आफ्नो पहिचान मजबुत बनाउने लक्ष्य राखेको छ।
