— एमालेका स्थायी कमिटी सदस्य तथा कोशी प्रदेशका मुख्यमन्त्री हिक्मतकुमार कार्कीले वर्तमान सरकारले चुनाव गर्न नसक्ने दाबी गरेका छन् ।
एमालेले धनकुटामा गरेको सभालाई सम्बोधन गर्दै कार्कीले अहिले एमालेको मुख्य माग संसद् पुनःस्थापना भएकाले निर्वाचनको नाटक मञ्चन नगर्न सरकारलाई आग्रह गरे । उनले लोकतान्त्रिक शक्तिहरुलाई विश्वासमा लिएर प्रतिनिधिसभा पुनःस्थापना गरेर अहिले उठेका माग सम्बोधन गर्ने र त्यसपछि मात्रै चुनावको विषयमा छलफल हुने उनको भनाइ थियो । कार्कीले चुनाव हुन सुरक्षा निकाय तन्दुरुस्त हुनुपर्ने, नागरिक त्यसका लागि तयार हुनुपर्ने बताए ।
असंवैधानिक तवरबाट बनेको सुशीला कार्की नेतृत्वको सरकारले गठन गरेको आयोगले तर्साउन खोजेर एमाले नडराउने उनको भनाइ छ । सुरक्षाकर्मीको तेजोबध गरेर शान्तिपूर्ण चुनावको परिकल्पना गर्न नसकिने भन्दै कार्कीले लुटिएका हतियार फिर्ता गर्न र अपराधीहरुलाई कारबाही गर्न सरकारले नसकेको आरोप लगाए ।
सभाअघि एमालेले धनकुटा सदरमुकाममा प्रदर्शन गरेको थियो । मदनचोक, बीचबजार, हुलाकटोल, भीमनारायण चोक, माथिल्लो कोप्चे, तल्लो कोप्चे, टुँडिखेल परिक्रमा गरेर बसपार्कमा सभा गरेको हो ।
सभालाई एमाले केन्द्रीय सदस्य राजेन्द्रकुमार राई, धनकुटा जिल्ला अध्यक्ष शिव आङ्ला लिम्बु, नेता अर्जुन राईले सम्बोधन गरेका थिए ।
