— नेपाल वायुसेवा निगमले आन्तरिक उडानहरूको संख्यामा आएको कमी र सञ्चालन स्थितिअनुसार करार तथा मासिक ज्यालादारीमा कार्यरत केही कर्मचारीको सेवा अन्त्य गरेको जनाएको छ ।
निगमका प्रवक्ता अनिल घिमिरेका अनुसार, निगमले सञ्चालनमा नरहेका आन्तरिक स्टेसन तथा सीमित उडान भइरहेका स्थानहरूमा आवश्यकतानुसार कर्मचारी संख्या घटाउने नीतिअनुसार यो निर्णय गरेको हो।
'निगमले करार सेवा तथा मासिक ज्यालादारीमा कार्यरत ६ जना कर्मचारीको सेवा आजको मितिदेखि नै अन्त्य गरेको छ,' प्रवक्ता घिमिरेले जानकारी दिएका छन्। उनका अनुसार यो कदम निगमलाई चुस्त दुरुस्त रूपमा सञ्चालन गर्दै बदलिँदो परिस्थिति र आर्थिक दायित्वलाई सन्तुलनमा ल्याउने उद्देश्यले गरिएको हो।
हाल निगममा जम्मा १,४७६ जना कर्मचारी कार्यरत छन्। तीमध्ये ३०८ जना करारमा, २७७ जना मासिक ज्यालादारीमा, र ८९१ जना स्थायी रूपमा कार्यरत रहेको निगमले जनाएको छ।
निगमको आर्थिक भार कम गर्दै कार्यक्षमता अभिवृद्धि गर्ने दीर्घकालीन उद्देश्यका साथ सुधारात्मक कदमको थालनी गरिएको हो । निगमले आगामी दिनमा पनि संगठनात्मक संरचना सुदृढ पार्दै कार्यसम्पादन सुधारका थप कदमहरू अघि बढाइने जनाएको छ।
