— भदौ २४ गतेको प्रदर्शनका क्रममा घोराही र तुलसीपुरका विभिन्न सरकारी कार्यालय आगजनी, तोडफोड र लुटपाट गरेको आरोपमा प्रहरीले बुधबार १० जनालाई पक्राउ गरेको छ ।
पक्राउ पर्नेमा जिल्ला अदालत घोराहीमा आगजनी, तोडफोड र लुटपाट गर्ने दुई तथा जिल्ला ट्राफिक प्रहरी कार्यालय घोराहीमा आगजनी, तोडफोड र लुटपाट गर्ने तीन जना रहेको जिल्ला प्रहरी प्रवक्ता डीएसपी चक्रबहादुर शाहले बताए ।
यसैगरी उच्च अदालत तुलसीपुरमा आगजनी, तोडफोड र लुटपाट गर्ने दुई तथा तुलसीपुर बसपार्कस्थित अस्थायी प्रहरी पोष्टमा आगजनी, तोडफोड र लुटपाट गर्ने तीन जना पक्राउ परेको उनले जानकारी दिए ।
पक्राउ पर्नेमा जिल्ला अदालत घोराहीमा आगजनी, तोडफोड र लुटपाट गर्ने तुलसीपुर उपमहानगरपालिका–१ भमके घर भई हाल घोराही उपमहानगरपालिका–१५, ट्राफिक चोक डेरा गरी बस्ने २५ वर्षीय नविन नेपाली र अर्घाखाँचीको छत्रदेव गाउँपालिका–७, काउले घर भई घोराही–१४, नयाँ बजार डेरा गरी बस्ने ३७ वर्षीय कृष्ण पाण्डे छन् । उनीहरूलाई आपराधिक प्रवेश तथा आपराधिक उपद्रवसम्बन्धी कसुरमा जिल्ला अदालतबाट पाँच दिनको म्याद थप गरी अनुसन्धान गरिरहेको डीएसपी शाहले बताए ।
यसैगरी जिल्ला ट्राफिक प्रहरी कार्यालय घोराहीमा आगजनी, तोडफोड र लुटपाट गर्ने घोराही–१५, मिलनचोकका १८ वर्षीय हैदर अली, ३० वर्षीय आकाश गिरी र घोराही–३, भानपुर निवासी ४७ वर्षीय बसन्त अधिकारी पक्राउ परेका छन् । उनीहरूलाई आपराधिक प्रवेश तथा आपराधिक उपद्रवसम्बन्धी कसुरमा जिल्ला अदालतबाट सात दिनको म्याद थप गरी अनुसन्धान गरिरहेको डीएसपी शाहले जानकारी दिए ।
यसैगरी उच्च अदालत तुलसीपुरमा आगजनी, तोडफोड र लुटपाट गर्ने तुलसीपुर–७, राजापुरका २६ वर्षीय रुपेश नेपाली र सल्यानको बागचौर नगरपालिका–२ घर भई हाल तुलसीपुर–९, बेलुवा बस्ने १८ वर्षीय सुनिल वली पक्राउ परेका छन् ।
यस्तै, तुलसीपुर बसपार्कस्थित अस्थायी प्रहरी पोष्टमा आगजनी, तोडफोड र लुटपाट गर्ने तुलसीपुर–५, बसपार्क निवासी २० वर्षीय करण सुनार, १८ वर्षीय मुकेश भण्डारी र तुलसीपुर–६, शान्तिनगर टोल निवासी १८ वर्षीय ज्ञानेन्द्र गन्धर्व पक्राउ परेका छन् । उनीहरू सबैलाई आपराधिक प्रवेश तथा आपराधिक उपद्रवसम्बन्धी कसुरमा जिल्ला अदालतबाट पाँच दिनको म्याद थप गरी अनुसन्धान गरिरहेको डीएसपी शाहले बताए ।
