— साबिक च्याम्पियन जनकपुर बोल्ट्सले नेपाल प्रिमियर लिग (एनपीएल) का लागि बुधबार क्लाउड एजुकेसन एन्ड भिसा सर्भिससँग प्रायोजन सम्झौता गरेको छ ।
क्लाउड जनकपुर टोलीको आधिकारिक एजुकेसन कन्सल्टेन्सको रूपमा रहने छ । अस्ट्रेलियाको सिड्नीमा मुख्य कार्यालय रहेको क्लाउडले नेपालमा काम गर्दै आएको छ ।
सम्झौतामा जनकपुरका प्रबन्ध निर्देशक निरोज खतिवडा र क्लाउडका प्रमुख कार्यकारी अधिकृत अनिश गौतमले हस्ताक्षर गरे । सीईओ गौतमले राम्रो टिम स्पिरिटका साथ खेलेर ट्रफी रक्षा गर्न शुभकामना दिए । गत वर्ष जनकपुरले सुदूरपश्चिम रोयल्सलाई फाइनलमा पराजित गर्दै उपाधि जितेको थियो ।
प्रबन्ध निर्देशक खतिवडाले यो साझेदारी लामोसम्म जाने विश्वास लिए । जनकपुर खेलाडीले लगाउने हेल्मेटमा क्लाउड नेपालको लोगो हुनेछ । एनपीएललाई जनकपुरले नेपाल ल्युबसँग लुब्रिकन पार्टनरको रूपमा सम्झौता गरिसकेको छ ।
गत वर्ष जनकपुरलाई उपाधि दिलाएका प्रशिक्षक पुबुदु दासानायके विराटनगर किंग्स लागिसकेका छन् । उनको स्थानमा जनकपुरले वेस्ट इन्डिजका ब्याटिङ हस्ती शिवनारायण चन्द्रपाललाई प्रशिक्षक बनाइसकेको छ । गत सिजन जनकपुरको कप्तानी गरेका अनिल शाहले नयाँ प्रशिक्षकबाट थप सिक्न पाउने अपेक्षा राखे । उनले यो सिजन टोलीको कप्तानी कस्ले गर्ने भन्नेबारे टोलीले घोषणा गर्न बाँकी भएको सुनाए ।
