— तिब्बतको न्यालम भन्सारमा नेपालतर्फ पठाउन लागिएका मालसामानका सयौं कन्टेनर जाँचपासमा ढिलाइ हुँदा चिनियाँ क्षेत्रमै रोकिएका छन् । भन्सार जाँचपासमा भएको ढिलाइका कारण न्यालम, खासालगायत बजार क्षेत्रमा करिब ६ सय कन्टेनर अड्किएको सिन्धुपाल्चोक उद्योग वाणिज्य संघका अध्यक्ष बुद्धराज बस्नेतले जनाए ।
‘दसैं–तिहार अघिदेखिको समस्या अझै समाधान भएको छैन । ढिलाइका कारण करोडौं मूल्यका सामान बोकेका कन्टेनर चीनमै थन्किएका छन् । व्यापारी आजित छन्, सरकारले तत्काल पहल गर्नुपर्छ,’ बस्नेतले भने ।
व्यवसायीका अनुसार फलफूल, कपडा, दैनिक उपभोग्य वस्तुभन्दा विद्युतीय सवारीसाधनको जाँचलाई प्राथमिकता दिइँदा अन्य कन्टेनर रोकिएका हुन् । रसुवा नाका २४ असारदेखि बन्द रहँदा सम्पूर्ण व्यापार तातोपानी नाकातर्फ ‘डाइभर्ट’ भएको छ । तर पहिरोका कारण कोदारी सडक करिब दुई महिना अवरुद्ध हुँदा चाडपर्वका लागि ल्याइएका सामग्री लामो समय उतै थन्किएका हुन् । दसैंअघि केही कन्टेनर मुस्ताङस्थित कोरोला नाकाबाट पनि नेपाल भित्रिएका थिए ।
फलफूलजस्ता वस्तुलाई ‘ग्रिन च्यानल’ प्रणालीअन्तर्गत छिटो क्लियरेन्स दिनुपर्ने अन्तर्राष्ट्रिय अभ्यास छ । तर चिनियाँ भन्सार अधिकारीहरूले त्यस्ता वस्तुमा समेत अनावश्यक ढिलाइ र अलमल गरिरहेको व्यापारीको गुनासो छ । ढिलाइ चीनतर्फकै प्रक्रियामा भएको तातोपानी सुक्खा बन्दरगाह तथा भन्सार कार्यालयका प्रमुख राजेन्द्रप्रसाद चुडालको भनाइ छ ।
