— पूर्व ऊर्जामन्त्री तथा काँग्रेस नेता दीपक खड्का सञ्चालक रहेको खड्का ल्याण्ड डेभलपमेन्ट प्रालिले स्काउटको जग्गामा बनाएका संरचनाहरु भत्काउन सुरु गरिएको छ ।
खेलकूदमन्त्री बब्लु गुप्ता सहितको टोली पुगेर लैनचौरस्थित जग्गामा बनेका संरचना डोजर लगाएर भत्काउन थालिएको हो ।
२०७५ मा भाडा सम्झौता समाप्त भएपनि खड्का ल्याण्ड प्रालिले जग्गा छाड्न र फिर्ता गर्न अटेरी गर्दै आएको थियो भने भाडा समेत नियमितरुपमा बुझाएको छैन।
स्काउटको लैनचौरस्थित केन्द्रीय कार्यालय परिसरमा रहेको तीन रोपनी जग्गा प्रालिले भाडामा लिएको थियो। तीन रोपनी जग्गा भाडामा लिए पनि करिब १२ रोपनी जग्गा प्रालिले अतिक्रमण गरेर भोगचलन गर्दै आएको थियो। समयमा जग्गा भाडा भुक्तानी नगरेपछि २०८१ वैशाख ६ गते जिल्ला प्रशासन कार्यालय काठमाडौँले उक्त जग्गा र त्यहाँ बनेको भवनलगायत संरचनामा सिलबन्दी गरेको थियो।
