— एमाले अध्यक्ष केपी शर्मा ओलीले वर्तमान सरकार चुनाव गराउन नबनेको दाबी गरेका छन् । काठमाडौंमा भएको एक कार्यक्रममा उनले सरकारको कामकारबाहीले चुनाव नगराउने दिशामा गएको बताए ।
‘यो सरकार चुनाव गराउन बनेको होइन । ६ महिनामा चुनाव गराउने भने पनि केही-केही देशमा ५ वर्ष भयो, चुनाव भएको छैन । यो सरकारले चुनाव गराउँदैन,’ उनले भने, प्रतिनिधसभा पुन:स्थापना गरेर राष्ट्रलाई संविधानको ट्य्राकमा फर्काउने हो ।’ उनले सरकारका मन्त्रीलाई धेरै नबोल्न भन्दै आफ्नो जिम्मेवारी पूरा गर्न आग्रह गरे ।
‘सरकारका मन्त्रीले धेरै जिब्रो नचलाए हुन्छ । निर्वाचन गराउने जिम्मेवारी होइन ? सर्वोच्चले नबोलाउन भन्दा राजदूतहरू बोलाइन्छ । देशका प्रतिनिधि हुन् राजदूत । इन सर्भिस एम्बेसडर होइनन् उनीहरू,’ उनले भने, ‘राजदूत फर्केर आएर परराष्ट्रमा हाजिर गर्ने । कानुन थाहा छ कि छैन सरकारलाई ? कुन हाजिर पुस्तिकामा हाजिर गर्ने ? त्यस्ता हावा कुरा गर्ने ?’
उनले अहिले पार्टी समाप्त गर्ने गतिविधि भइरहेको बताए । ‘अहिले पार्टी नै समाप्त पार्ने लहर चलेको छ । ट्रेड युनियन विश्वव्यापी संस्था हो । शोषणकारी युगमा जन्मिएको हो,’ उनले भने, ‘ट्रेड युनियन राइट त्यतिबेला हो । ट्रेड युनियन मासिँदैन । कसैले मास्न सक्दैन ।’
