— सरकार निजी क्षेत्रको साझेदार भएकाले सहकार्य अत्यावश्यक रहेको अर्थमन्त्री रामेश्वर खनालले बताएका छन् । आफूले अर्थ मन्त्रालयको नेतृत्व लिएको भोलिपल्टै मेरो संवाद निजी क्षेत्रबाटै भएको पनि उनले बताए । निजी क्षेत्रसँग सहकार्य र छलफल निरन्तर चलिरहेको र त्यही क्रममा आजको ११औं छलफल भएको उनले बताए ।
शनिबार महासंघले आयोजना गरेको राष्ट्रिय आर्थिक बहस २.० मा बोल्दै अर्थमन्त्री खनालले अहिलेको समयमा मुलुकमा व्याप्त रहेको खराब अवस्थाबाट अर्थतन्त्रलाई माथि उठाउन सरकार र निजी क्षेत्र हातेमालो गरेर अधि बढ्नुपर्ने जरुरी भएको बताएका हुन् । ‘यो अवधिमा अर्थतन्त्र सुधारका लागि धेरै काम भएको छ,’ उनले भने ।
यस बाहेक भन्सार, राजस्व चुहावट निवारणमा पनि सुधार गरिएको उनको भनाइ थियो । ‘अहिले व्यवसायीलाई दुःख नदिईकन कामको अनुगमन र निमयन भइरहेको छ । तर, गल्ती गर्नेलाई भने नियन्त्रण गर्नैपर्छ,’ उनले भने, ‘कामको निष्पक्ष छानबिन भइरहेको छ ।’
