: अमेरिकी राष्ट्रपति डोनाल्ड ट्रम्पले आफ्नो विजयपछि नवनिर्वाचित न्यूयोर्क शहरका मेयर जोहरान ममदानीले दिएको भाषणलाई 'क्रोधित' भन्दै टिप्पणी गरेका छन्। उनले ममदानी सुरूदेखि नै गलत दिशामा गइरहेको र सफल हुने सम्भावना समेत नरहेको दावी गरेका छन्।
फक्स न्यूजसँग कुरा गर्दै ट्रम्पले भनेका छन् ,'मलाई लाग्यो कि उनको भाषण धेरै क्रोधित थियो, विशेष गरी मेरो विरुद्धमा।' 'उनीहरूले मलाई राम्रो व्यवहार गर्नुपर्छ किनभने म धेरै कुराहरू अनुमोदन गर्ने जिम्मेवारी बोकेको छु। तिनीहरूले नराम्रो सुरुवात गरेका छन्,' उनले भने।
न्यूयोर्कको मेयर चुनाव जितेपछि जोहरान ममदानीले ट्रम्पलाई उल्लेख गर्दै भनेका थिए, "उनलाई सफल बनाउन सक्ने मानिसहरूले उनलाई हराउन पनि सक्छन्।'
चुनावअघि ट्रम्पले यदि ममदानी मेयर बने भने उनलाई न्यूयोर्कलाई आर्थिक सहयोग गर्न गाह्रो हुने अभिव्यक्ति दिएका थिए। ट्रम्पले ममदानीलाई मत नदिन समेत अपिल गरेका थिए।
