: नेपालका निजी क्षेत्रका छाता संगठनहरूले जेनजी आन्दोलनपछि एकजुट भएर राष्ट्र निर्माणमा सक्रिय हुने घोषणा गरेका छन्। नेपालका निजी क्षेत्रका छाता संगठनहरूले सोमबार काठमाडौंमा संयुक्तरूपमा पत्रकार सम्मेलन गर्दै राष्ट्र निर्माणमा थप जिम्मेवार र सक्रिय भूमिका खेल्न एकताबद्ध भएर अघि बढ्ने घोषणा गरेका हुन्।
मुलुकको शान्ति र समृद्धिका लागि ऐक्यबद्धता जनाउँदै उनीहरूले थप जिम्मवार भइ निरन्तर योगदानका निम्ति समर्पित रहने जनाएका छन्। राष्ट्रिय व्यवसायिक पहलको संयोजनमा ३० भन्दा बढी निजी क्षेत्रका छाता संगठन एकीकृत भएका हुन्।
राष्ट्रिय व्यवसायिक पहलका अध्यक्ष कुशकुमार जोशीले राष्ट्रिय व्यवसायिक पहलको संयोजनमा कार्यदल गठन गरि सरकार, राजनीतिक दल, नवयुवाहरूलगायत सरोकारवालासँगै सहकार्य गर्दै निजी क्षेत्रको भूमिकालाई स्पष्ट पार्ने बताए। उनले सरकारले घोषणा गरेको निर्वाचन तोकिएको समयमा नै सुनिश्चित गर्न भूमिका खेल्ने उल्लेख गरे।
सुशासन र भ्रष्टाचारमुक्त देश बनाउने युवाहरूको अभियानलाई निजी क्षेत्रका छाता संगठनहरूले साथ र समर्थन गर्ने उनले बताए। उनीहरूले निजी क्षेत्रप्रति रहेको केही गलत धारणा सच्याउन सार्वजनिक सचेतना अभियान सञ्चालन गर्ने, निजी क्षेत्रको योगदानबारे तथ्यसंकलन र विश्लेषण गरी जनतासमक्ष प्रस्तुत गर्ने र नव युवाहरूसमेतसँग संयुक्त रूपमा सकारात्मक भाष्य विकास गर्न पहल गर्ने जनाएका छन्।
